കോഴിക്കോട്: ചെലവ് കുറക്കാന്‍ എം പാനല്‍ ജീവനക്കാരെ കൂട്ടത്തോടെ പിരിച്ചുവിടുമ്പോള്‍, റദ്ദ് ചെയ്ത റാങ്ക് ലിസ്റ്റില്‍ നിന്നുള്ളവര്‍ക്ക് എം പാനല്‍ നിയമനം. കെ.എസ്.ആര്‍.ടി.സി ഡ്രൈവര്‍ തസ്തികയിലേക്കുള്ള നിയമനങ്ങളാണ് റദ്ദായ റാങ്ക് പട്ടികയില്‍ നിന്നും നടത്തി കോര്‍പറേഷന്‍ ഉദ്യോഗാര്‍ഥികളെ ചൂഷണം ചെയ്യുന്നത്.
പി.എസ്.സി പ്രസിദ്ധീകരിച്ച ഡ്രൈവര്‍ റാങ്ക് ലിസ്റ്റില്‍ നിന്നും സാമ്പത്തിക നഷ്ടത്തിന്റെ പേരില്‍ ആരെയും നിയമിക്കാന്‍ കോര്‍പറേഷന്‍ തയാറായിരുന്നില്ല. 2500 ഓളം ഒഴിവുകള്‍ റിപ്പോര്‍ട്ട് ചെയ്തപ്പോഴാണ് നിയമനം നടത്താതെ ഈ ലിസ്റ്റ് ഇക്കഴിഞ്ഞ ഡിസംബറില്‍ റദ്ദായത്. ഉദ്യോഗാര്‍ഥികള്‍ ഏറെ പ്രതിഷേധമുയര്‍ത്തിയെങ്കിലും ഒരാളെപ്പോലും നിയമിച്ചില്ല. എന്നാല്‍ ഈ ലിസ്റ്റില്‍ നിന്നു തന്നെയാണ് ഇപ്പോള്‍ എം പാനല്‍ ഡ്രൈവര്‍മാരെ നിയമിച്ചുകൊണ്ടിരിക്കുന്നത്.
സംസ്ഥാനത്തൊട്ടാകെയുള്ള ഡിപ്പോകളില്‍ ഡ്രൈവര്‍മാരുടെ നിയമനം പൂര്‍ത്തിയായി വരികയാണ്. ഒരാളില്‍നിന്ന് 5000 രൂപ സെക്യൂരിറ്റി നിക്ഷേപമായും വാങ്ങുന്നുണ്ട്. 179 ദിവസം പൂര്‍ത്തിയാകുമ്പോള്‍ ഒരു ദിവസത്തെ സര്‍വിസ് ബ്രേക്കും നല്‍കുമെന്ന നിര്‍ദേശത്തിലാണ് നിയമനം. സ്ഥിര നിയമനത്തിന് അര്‍ഹതയുണ്ടായിരുന്ന നൂറു കണക്കിന് പേരെയാണ് ഇപ്പോള്‍ സാമ്പത്തിക പ്രതിസന്ധിയുടെ പേരില്‍ താല്‍ക്കാലികക്കാരായി നിയമിക്കുന്നത്. ഇതു പോലെ കണ്ടക്ടര്‍ ലിസ്റ്റും നിയമനം നല്‍കാതെ കാലഹരണപ്പെട്ടിട്ടുണ്ട്. ഈ ലിസ്റ്റില്‍ നിന്നു തന്നെ എം പാനല്‍ കണ്ടക്ടറെ നിയമിക്കാനുള്ള നീക്കവും കെ.എസ്.ആര്‍.ടി.സി നടത്തുന്നുണ്ട്.