പാലാ: കന്യാസ്ത്രീയെ ലൈംഗികമായി പീഡിപ്പിച്ചുവെന്ന കേസിലെ പ്രതിയായ ബിഷപ്പ് ഫ്രാങ്കോ മുളയ്ക്കല്‍ പാലാ കോടതിയിലെത്തി കുറ്റപത്രം കൈപ്പറ്റി. കോടതിയുടെ സമന്‍സ് പ്രകാരമാണ് ഇന്നലെ അദ്ദേഹം പാലാ ജുഡിഷ്യല്‍ ഫസ്റ്റ് ക്ലാസ് കോടതിയിലെത്തിയത്. ജാമ്യത്തില്‍ കഴിയുന്ന അദ്ദേഹത്തിന്റെ തുടര്‍ജാമ്യാപേക്ഷ മജിസ്‌ട്രേറ്റ് എസ് ലക്ഷ്മി അനുവദിച്ചു. തുടര്‍ നടപടികള്‍ക്കായി അടുത്ത മാസം ഏഴിന് കേസ് വീണ്ടും വിളിക്കും. കോടതി ചേരുന്ന സമയത്തിന് 15 മിനുട്ട് മുന്‍പു തന്നെ ഫ്രാങ്കോ കോടതിയിലെത്തിയിരുന്നു. കേസ് വിളിച്ച് അഞ്ചു മിനുട്ടുകള്‍ക്കുള്ളില്‍ നടപടികള്‍ പൂര്‍ത്തിയായി. ഇദ്ദേഹത്തിന്റെ അഭിഭാഷകര്‍ തുടര്‍ജാമ്യാപേക്ഷ സമര്‍പ്പിക്കുകയും കോടതി അംഗീകരിക്കുകയും ചെയ്തു.