തൃശൂര്‍: മുഖ്യമന്ത്രിയുടെ ദുരിതാശ്വാസനിധിയിലേക്കുള്ള ധനസമഹാരണത്തിനായി ജില്ലയിലെ പൊതുജനങ്ങളയാകെ പങ്കാളികളാക്കാന്‍ മുഴുവന്‍ വകുപ്പുകളും മുന്നിട്ടിറങ്ങണമെന്ന് ജില്ലാ കലക്ടര്‍ ടി.വി അനുപമ അഭ്യര്‍ഥിച്ചു. ധനസമാഹാരണം പ്രവര്‍ത്തനങ്ങളുടെ മുന്നോടിയായി കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന വകുപ്പുതല ഉദ്യോഗസ്ഥരുടെ യോഗത്തിലാണ് ജില്ലാ കലക്ടറുടെ അഭ്യര്‍ഥന. ധനസമാഹാരണത്തിന്റെ സംസ്ഥാനതല ചുമതല വഹിക്കുന്ന ഓഫിസര്‍ സന്തോഷ് കൗശിക് വിഡിയോ കോണ്‍ഫറന്‍സിലൂടെ യോഗത്തെ അഭിസംബോധന ചെയ്തു.
ജില്ലയില്‍ ദുരിതാശ്വാസ പ്രവര്‍ത്തങ്ങള്‍ക്കായി സര്‍ക്കാര്‍ 100 കോടി രൂപയോളം അനുവദിച്ചതായി ജില്ലാ കലക്ടര്‍ അറിയിച്ചു. എന്നാല്‍ ദുരിതാശ്വാസനിധിയിലേക്ക് ഇതുവരെ ജില്ലയില്‍ നിന്നുള്ള സംഭാവന അഞ്ചരക്കോടി രൂപയില്‍ താഴെയാണ്. മുഖ്യമന്ത്രിയുടെ ദുരിതാശ്വാസനിധിയുടെ അക്കൗണ്ട് നമ്പറും വിവരങ്ങളും രേഖപ്പെടുത്തിയ പോസ്റ്ററുകള്‍ എല്ലാ വകുപ്പുകളുടെ ഓഫിസിലും പ്രദര്‍ശിപ്പിക്കണം. ധനസമാഹാരണ സന്ദേശം ജനങ്ങളിലെത്തിക്കാന്‍ എല്ലാവരും തയാറാകണം.
ആര്‍.ടി.ഒ, കൃഷി, വിദ്യാഭ്യാസം, എക്‌സൈസ്, പൊലിസ്, ഫോറസ്റ്റ്, പൊതുമരാമത്ത് വകുപ്പ്, നിര്‍മതി കേന്ദ്രം, ഇറിഗേഷന്‍, കെ.എസ്.ഇ.ബി, മൃഗസംരക്ഷണം, ടൂറിസം, ഫിഷറീസ്, സിവില്‍ സപ്ലൈസ്, നഗരസഭകള്‍, കോര്‍പറേഷന്‍, ജി.എസ്.ടി, ജില്ലാ വ്യവസായ കേന്ദ്രം തുടങ്ങി വിവിധ വകുപ്പു പ്രതിനിധികള്‍ സംസാരിച്ചു.
ദുരിതാശ്വാസനിധിയിലേക്കുളള ധനസമാഹരണ പ്രവര്‍ത്തനങ്ങള്‍ ഏകോപിപ്പിക്കാന്‍ ഏഴിന് പൊതുവിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ്, കൃഷി വകുപ്പ് മന്ത്രി അഡ്വ. വി.എസ് സുനില്‍കുമാര്‍, സന്തോഷ് കൗശിക് എന്നിവരുടെ നേതൃത്വത്തില്‍ പ്രത്യേക യോഗം ചേരും.