അമ്പലപ്പുഴ: നിരവധി ബൈക്ക് മോഷണകേസുകളിലെ പ്രതിയായ യുവാവിനെ പോലീസ് പിടികൂടി. കാക്കാഴം പുതുവല്‍ പൊക്കത്തില്‍ പൊടിയന്റെ മകന്‍ പൊടിമോനെ (19) യാണ് പുന്നപ്ര എസ്.ഐ ഇ.ഡി ബിജുവിന്റെ നേതൃത്വത്തിലുളള പോലീസ് പിടികൂടിയത്. കഴിഞ്ഞദിവസം രാത്രികാല പരിശോധനയ്ക്കിടെ പുന്നപ്ര ചളളിഭാഗത്തുവെച്ച് ബൈക്കില്‍ വന്ന പൊടിമോനെ സംശയം തോന്നി ചോദ്യം ചെയ്തപ്പോഴാണ് മോഷണവിവരം പുറത്തറിയുന്നത്. കരുനാഗപ്പളളിയില്‍നിന്ന് മോഷ്ടിച്ച ബൈക്കിന്റെ പുറകുവശത്തെ നമ്പര്‍പ്ലേറ്റ് വ്യക്തമല്ലായിരുന്നു. പിന്നീട് അറവുകാട് ഗുരുപാദം ജംഗ്ഷനുസമീപം പൊടിമോന്‍ വാടകയ്ക്ക് താമസിക്കുന്ന വീട്ടില്‍ പരിശോധന നടത്തിയപ്പോള്‍ മോഷ്ടിച്ച മറ്റൊരു ബൈക്കും കണ്ടെത്തി. ഹരിപ്പാടുനിന്ന്  മോഷ്ടിച്ച ബൈക്ക് ഹരിപ്പാട് റെയില്‍വേ സ്റ്റേഷനില്‍ സൂക്ഷിച്ചിരിക്കുകയാണെന്ന് പൊടിമോന്‍ പറഞ്ഞു. പിന്നീട് പോലീസ് ഇത് കണ്ടെടുത്തു. അമ്പലപ്പുഴ സ്റ്റേഷന്‍പരിധിയില്‍ ബൈക്ക് മോഷ്ടിച്ച എട്ട്  കേസുകളില്‍ പ്രതിയായ പൊടിമോന്‍ രണ്ട് വര്‍ഷം മുന്‍പ് അമ്പലപ്പുഴ സ്റ്റേഷനില്‍നിന്ന് ചാടിപ്പോയിരുന്നു.  പ്രതിയെ കോടതി റിമാന്റുചെയ്തു. സിവില്‍ പോലീസ് ഓഫീസര്‍മാരായ പ്രദീപ്, വില്യം അഗസ്റ്റിന്‍ എന്നിവരും എസ്.ഐക്കൊപ്പം ഉണ്ടായിരുന്നു.