കാസര്‍കോട്: കുടുംബശ്രീ ജില്ലാ വാര്‍ഷികം 15,16 തീയതികളിലായി അജാനൂര്‍ പഞ്ചായത്തിലെ മഹാകവി പി. സ്മാരക വൊക്കേഷനല്‍ ഹയര്‍ സെക്കന്‍ഡറി സ്‌കൂളില്‍ നടക്കും.
ജില്ലാ വാര്‍ഷികത്തോടനുബന്ധിച്ച് 14നു അജാനൂര്‍ നഗരത്തില്‍ നിന്ന് പരിപാടി നടക്കുന്ന വെള്ളിക്കോത്ത് സ്‌കൂളിലേക്ക് വിളംബര ജാഥ സംഘടിപ്പിക്കും. ജില്ലാ വാര്‍ഷികത്തിനു മുന്നോടിയായി താലൂക്ക് വാര്‍ഷികാഘോഷങ്ങള്‍ എട്ട് മുതല്‍ 10 വരെ നടക്കും.
 എട്ടിന് മഞ്ചേശ്വരം താലൂക്ക് വാര്‍ഷികം ജി.എസ്.ബി.എസ് കുമ്പള ജി.യു.പി സ്‌കൂളില്‍ ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ ഉദ്ഘാടനം ചെയ്യും. എട്ട്, ഒന്‍പത് തിയതികളില്‍ കാസര്‍കോട് താലൂക്ക് വാര്‍ഷികം ജി.എച്ച്.എസ്.എസ്.എസ് ചെര്‍ക്കളയില്‍ പി. കരുണാകരന്‍ എം.പിയും, വെള്ളരിക്കുണ്ട് താലൂക്ക് വാര്‍ഷികം പരപ്പ ഗവ. ഹയര്‍സെക്കന്‍ഡറി സ്‌കൂളില്‍ ജില്ലാ പഞ്ചായത്ത് വൈസ് പ്രസിഡന്റ് ശാന്തമ്മ ഫിലിപ്പും ഉദ്ഘാടനം ചെയ്യും.
ഹോസ്ദുര്‍ഗ് താലൂക്ക് വാര്‍ഷികം ഉദിനൂര്‍ ഗവ. ഹയര്‍സെക്കന്‍ഡറി സ്‌കൂളില്‍ നീലേശ്വരം നഗരസഭാ ചെയര്‍മാന്‍ പ്രൊഫ. കെ.പി ജയരാജ് ഉദ്ഘാടനം ചെയ്യും. 6000ത്തോളം മത്സരാര്‍ഥികള്‍ പങ്കെടുക്കുന്ന ജില്ലാ വാര്‍ഷികാഘോഷത്തിനു ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ ചെയര്‍മാനും ജില്ലാ മിഷന്‍ കോര്‍ഡിനേറ്റര്‍ കെ.പി രഞ്ജിത്ത് ജനറല്‍ കണ്‍വീനറും, മന്ത്രി ഇ. ചന്ദ്രശേഖരന്‍, പി. കരുണാകരന്‍ എം.പി, ജില്ലയിലെ എം.എല്‍.എമാര്‍, കലക്ടര്‍ എന്നിവര്‍ രക്ഷാധികരികളുമായി സംഘാടക സമിതി രൂപീകരിച്ചു.
ജില്ലയില്‍ നിന്ന് ഒന്നാം സ്ഥാനം നേടുന്ന വിജയികള്‍ക്ക് 22, 23 തീയതികളില്‍ ആലപ്പുഴയില്‍ നടക്കുന്ന സംസ്ഥാന വാര്‍ഷികാഘോഷത്തില്‍ പങ്കെടുക്കാന്‍ അവസരം ലഭിക്കും.
സംസ്ഥാന വാര്‍ഷികത്തിന്റെ ഭാഗമായി 20, 21 തീയതികളില്‍ സി.ഡി.എസ് അധ്യക്ഷമാരുടെ സംഗമം, 24 മുതല്‍ 28 വരെ ട്രേഡ് ഫെയര്‍ 28ന് പൊതുസമ്മേളനം എന്നിവ നടക്കും.
 താലൂക്ക്തല വാര്‍ഷികാഘോഷങ്ങളുടെ ഒരുക്കങ്ങള്‍ പൂര്‍ത്തിയായതായി എ.ഡി.എം കെ. അംബുജാക്ഷന്‍, ജില്ലാ മിഷന്‍ കോര്‍ഡിനേറ്റര്‍ കെ.പി രഞ്ജിത്ത്, ഒ.വി ശ്രീപ്രഭ, സി. ഹരിദാസ്, ഇ. സൈജു എന്നിവര്‍ വാര്‍ത്താസമ്മേളനത്തില്‍ അറിയിച്ചു.