കൊച്ചി: പുതിയ സീസണില്‍ കേരള ബ്ലാസ്റ്റേഴ്‌സിനെ പരിശീലിപ്പിക്കാന്‍ പുതിയ പരിശീലകനെത്തി. നോര്‍ത്ത് ഈസ്റ്റിന്റെ മുന്‍ പരിശീലകന്‍ എല്‍കോ ഷറ്റോരിയെയാണ് പുതിയ പരിശീലകനായി നിയമിച്ചത്. ആക്രമണ ഫുട്‌ബോളിന്റെ വക്താവായ ഷറ്റോരി ക്ലബിലെത്തുന്നതോടെ അക്രമണ ഫുട്‌ബോളിന് പ്രാധാന്യം ലഭിക്കും.

മോശം ഫോമിലുള്ള നോര്‍ത്ത് ഈസ്റ്റിനെ കഴിഞ്ഞ ഐ.എസ്.എല്ലില്‍ മികച്ച ടീമായി ഉയര്‍ത്താന്‍ ഷറ്റോരിക്ക് കഴിഞ്ഞിരുന്നു.
ഡേവിഡ് ജെയിംസിനെ പുറത്താക്കിയതിന് ശേഷം താല്‍കാലിക പരിശീലകനായി നെലോ വിന്‍ഗാഥയെ നിയമിച്ചിരുന്നെങ്കിലും കേരള ബ്ലാസ്റ്റേഴ്‌സിന്റെ പ്രകടനത്തില്‍ കാര്യമായ മാറ്റമൊന്നും ഉണ്ടായിരുന്നില്ല. നേരത്തെ നോര്‍ത്ത് ഈസ്റ്റ് യുനൈറ്റഡില്‍ സഹ പരിശീലകനായിരുന്ന ഷറ്റോരി ഈസ്റ്റ് ബംഗാള്‍, യുനൈറ്റഡ് സ്‌പോര്‍ട്‌സ് എന്നീ ഇന്ത്യന്‍ ലീഗ് ടീമുകളെയും പരിശീലിപ്പിച്ചിട്ടുണ്ട്. ഷറ്റോരിക്ക് കീഴില്‍ പുതിയ വിന്നിങ് ഇലവനെ വാര്‍ത്തെടുക്കാനുള്ള ഒരുക്കത്തിലാണ് ബ്ലാസ്റ്റേഴ്‌സ്.