അബൂദബി: അര്‍ജന്റീന ഇതിഹാസം ഡീഗോ മറഡോണ വീണ്ടും പരിശീലക കുപ്പായം അണിയുന്നു. യു.എ.ഇ ക്ലബ് അല്‍ ഫുജയ്‌റ എസ്.സിയുടെ പുതിയ കോച്ചായി മറഡോണ ചുമതലയേറ്റു. യു.എ.ഇയിലെ രണ്ടാം ഡിവിഷന്‍ ക്ലബാണ് അല്‍ ഫുജയ്‌റ. തന്റെ ഔദ്യോഗിക ഫേസ്ബുക്ക് പോസ്റ്റിലൂടെ മറോഡണ ഇക്കാര്യം സ്ഥിരീകരിച്ചിട്ടുണ്ട്. തന്റെ പേരും പ്രസിദ്ധമായ പത്താം നമ്പറും ആലേഖനം ചെയ്ത ചുവപ്പും വെള്ളയും കലര്‍ന്ന ജേഴ്‌സിയും പിടിച്ച് നില്‍ക്കുന്ന ഫോട്ടയും അദ്ദേഹം പോസ്റ്റ് ചെയ്തിട്ടുണ്ട്. അഞ്ച് വര്‍ഷത്തെ ഇടവേളയ്ക്ക് ശേഷമാണ് ഇതിഹാസം പരിശീലക കുപ്പായത്തില്‍ തിരിച്ചെത്തുന്നത്.
നേരത്തെ 2008ലെ ലോകകപ്പില്‍ അര്‍ജന്റീനയെ പരിശീലിപ്പിച്ച മറഡോണ 2011ല്‍ യു.എ.ഇയിലെ തന്നെ അല്‍ വാസല്‍ ക്ലബിനേയും പരിശീലിപ്പിച്ചിരുന്നു. ഒരു വര്‍ഷത്തിന് ശേഷം ഇതിഹാസ താരത്തെ കോച്ചിന്റെ സ്ഥാനത്ത് നിന്ന് ക്ലബ് പുറത്താക്കുകയായിരുന്നു. ഇക്കഴിഞ്ഞ ഫെബ്രുവരിയില്‍ ഫിഫ അദ്ദേഹത്തെ അംബാസഡറായും തിരഞ്ഞെടുത്തിരുന്നു.