വളാഞ്ചേരി: ഓട്ടോ-ടാക്‌സി സമരം അവസാനിപ്പിക്കാന്‍ അധികൃതര്‍ ഇടപെടണമെന്നാവശ്യപ്പെട്ട് തൊഴിലാളികള്‍ കഞ്ഞിവെപ്പ് സമരം നടത്തി.
വളാഞ്ചേരി കോഴിക്കോട് റോഡില്‍ പൊലിസ് ഒഴിപ്പിച്ച ഓട്ടോ സ്റ്റാന്‍ഡിലായിരുന്നു മോട്ടോര്‍ കോ-ഓര്‍ഡിനേഷന്‍ കമ്മിറ്റിയുടെ ആഭിമുഖ്യത്തില്‍ സമരം സംഘടിപ്പിച്ചത്. ട്രാഫിക് റെഗുലേറ്ററി കമ്മിറ്റിയുടെ തീരുമാനങ്ങള്‍ പുനഃപരിശോധിക്കണമെന്നാവശ്യപ്പെട്ട് മോട്ടോര്‍ കോ-ഓര്‍ഡിനേഷന്റെ ആഭിമുഖ്യത്തില്‍ ടൗണിലെ ഓട്ടോ-ടാക്‌സി തൊഴിലാളികള്‍ നടത്തുന്ന അനിശ്ചിതകാല പണിമുടക്ക് മൂന്നു ദിവസം പിന്നിട്ടു.
കഴിഞ്ഞ വെള്ളിയാഴ്ചയാണ് വളാഞ്ചേരി സി.ഐ യുടെ നേതൃത്വത്തില്‍ പൊലിസ് കോഴിക്കോട് റോഡിലെ ഓട്ടോ പാര്‍ക്കിംഗ് ഒഴിപ്പിച്ചത് - ഇതില്‍ പ്രതിഷേധിച്ചാണ് തൊഴിലാളികള്‍ സമരം ആരംഭിച്ചത്. ഇന്നലെ രാവിലെ തൊഴിലാളികള്‍ ടൗണില്‍ പ്രകടനം നടത്തി. കഞ്ഞിവെപ്പ് സമരം എസ്.ടി.യു ജില്ലാ സെക്രട്ടറി വി.പി അബ്ദുറഹിമാന്‍ ഉദ്ഘാടനം ചെയ്തു.
കോ-ഓര്‍ഡിനേഷന്‍ ചെയര്‍മാന്‍ മുഹമ്മദലി നീറ്റുകാട്ടില്‍ അധ്യക്ഷനായി. കണ്‍വീനര്‍ എം. ജയകുമാര്‍, കെ.എം.ഫിറോസ് ബാബു, ഇ.പി മുഹമ്മദലി, കെ. ഷാജിമോന്‍, മുഹമ്മദ് കുട്ടികരേക്കാട് ,പി, സൈതാലിക്കുട്ടി ഹാജി, എം.വി ബാലന്‍, എം. സുരേഷ്, വി.പി മുനീര്‍, നേതൃത്വം നല്‍കി. ഇന്ന് സമരം ഒത്തുതീര്‍പ്പാക്കാന്‍ അധികൃതര്‍ ഇടപെട്ടില്ലെങ്കില്‍ നാളെ രാവിലെ ദേശീയപാതയില്‍ ചക്രസ്തംഭനം നടത്തുമെന്ന് തൊഴിലാളി നേതാക്കള്‍ അറിയിച്ചു.