തിരുവനന്തപുരം: മധ്യപടിഞ്ഞാറ്  ബംഗാള്‍ ഉള്‍ക്കടലില്‍ രൂപംകൊണ്ട ന്യൂനമര്‍ദം ശക്തിയാര്‍ജിച്ചതായി  കേന്ദ്ര കാലാവസ്ഥാ വകുപ്പ്. ഇത്  ഇന്നലെ രാത്രിയോടെ  അതിതീവ്ര ന്യൂനമര്‍ദമായി മാറി. ഇന്ന് രാവിലെയോടെ  ബംഗാള്‍ ഉള്‍ക്കടലില്‍ നിന്നും  ആന്ധ്രാ തീരത്ത് നാര്‍സപുരിനും  വിശാഖപട്ടണത്തിനും ഇടയില്‍ മണിക്കൂറില്‍ പരമാവധി 75 കിലോമീറ്റര്‍ വേഗതയില്‍ കരയില്‍ പ്രവേശിക്കാനാണ് സാധ്യത. തുടര്‍ന്ന് ശക്തി കുറഞ്ഞ് ന്യൂനമര്‍ദമായി മാറി കരയിലൂടെ സഞ്ചരിച്ച് വ്യാഴാഴ്ചയോടെ തെക്കന്‍ ഗുജറാത്തിനും വടക്കന്‍ കൊങ്കണ്‍ തീരത്തിനും ഇടയില്‍ അറബിക്കടലില്‍ പ്രവേശിക്കും. തുടര്‍ന്ന് വീണ്ടും ശക്തിയാര്‍ജിച്ച് തീവ്ര ന്യൂനമര്‍ദമാകുമെന്നുമാണ് വിലയിരുത്തല്‍. 

  ന്യൂനമര്‍ദത്തിന്റെ സ്വാധീനത്തില്‍ കേരളത്തില്‍ ഇന്നും നാളെയും ശക്തമായ മഴ തുടരും. ഇന്ന് 11 ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് യെല്ലോ അലര്‍ട്ട് പ്രഖ്യാപിച്ചിട്ടുള്ളത്.ഇടിമിന്നലോട് കൂടിയ മഴക്കാണ് സാധ്യത. കേരള,കര്‍ണാടക തീരങ്ങളില്‍ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാല്‍ മത്സ്യത്തൊഴിലാളികള്‍ കടലില്‍ പോകരുത്. ഒക്ടോബര്‍ 15 ഓടെ  ബംഗാള്‍ ഉള്‍ക്കടലില്‍ ആന്‍ഡമാന്‍ തീരത്ത് പുതിയ ന്യൂന മര്‍ദം രൂപപ്പെടാന്‍ സാധ്യതയുണ്ടെന്നും കാലാവസ്ഥാ വിദഗ്ധര്‍ പറയുന്നു. തുടര്‍ച്ചയായുള്ള ന്യൂനമര്‍ദങ്ങള്‍ കാലവര്‍ഷത്തിന്റെ പിന്‍വാങ്ങല്‍ വൈകിക്കുമെന്നും വിദഗ്ധര്‍ ചൂണ്ടിക്കാട്ടുന്നു.