തിരുവനന്തപുരം: സ്വര്‍ണക്കടത്തു കേസ് പ്രതി സ്വപ്ന സുരേഷ് നിരവധി തവണ മുഖ്യമന്ത്രി പിണറായി വിജയനെ കണ്ടിരുന്നുവെന്ന മൊഴിയുടെ അടിസ്ഥാനത്തില്‍ സത്യം തേടി ദേശീയ അന്വേഷണ ഏജന്‍സികള്‍. മുഖ്യമന്ത്രിയെ കണ്ട ദിവസങ്ങളില്‍ എന്തിന് കണ്ടു എന്നും മൊഴിയില്‍ സത്യാസ്ഥയുണ്ടോ എന്നും പരിശോധിക്കാനാണ് അന്വേഷണ ഏജന്‍സികളുടെ തീരുമാനം. 

കൂടാതെ യു.എ.ഇ കോണ്‍സല്‍ ജനറല്‍ 2017ല്‍ മുഖ്യമന്ത്രിയുമായി ഔദ്യോഗിക വസതിയായ ക്ലിഫ് ഹൗസില്‍ സ്വകാര്യ കൂടിക്കാഴ്ച നടത്തിയെന്ന മൊഴിയും വിശദമായി പരിശോധിക്കാനാണ് എന്‍ഫോഴ്‌സ്‌മെന്റ് തീരുമാനിച്ചിരിക്കുന്നത്. അന്ന് സ്വപ്നയും കോണ്‍സല്‍ ജനറലിനോടൊപ്പം ഉണ്ടായിരുന്നെന്നും സ്വപ്ന എന്‍ഫോഴ്‌സ്‌മെന്റിനു മൊഴി നല്‍കിയിട്ടുണ്ട്. എന്നാല്‍ ഇത് എന്‍ഫോഴ്‌സ്‌മെന്റ് മുഖവിലയ്‌ക്കെടുത്തിട്ടില്ല. സ്വപ്ന പറഞ്ഞതില്‍ സത്യമുണ്ടോ എന്ന് കണ്ടെത്താന്‍ സെക്രട്ടേറിയറ്റിലെ മുഖ്യമന്ത്രിയുടെ ഓഫിസിലെ സി.സി.ടി.വിയും ക്ലിഫ് ഹൗസിലെ സന്ദര്‍ശക രജിസ്റ്ററും പരിശോധിക്കും. 

ക്ലിഫ് ഹൗസില്‍ കോണ്‍സല്‍ ജനറലുമായി മുഖ്യമന്ത്രി നടത്തിയ കൂടിക്കാഴ്ചയിലാണ് യു.എ.ഇ കോണ്‍സുലേറ്റും കേരള സര്‍ക്കാരും തമ്മിലുള്ള ആശയവിനിമയങ്ങള്‍ക്ക് മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിനെ ചുമതലപ്പെടുത്തിയ വിവരം മുഖ്യമന്ത്രി അനൗദ്യോഗികമായി അറിയിച്ചതെന്നാണ് സ്വപ്ന മൊഴി നല്‍കിയിരുന്നത്. സ്‌പേസ് പാര്‍ക്കിലെ ജോലി ഒഴിവ് സംബന്ധിച്ച് തന്നെ അറിയിച്ചത് ശിവശങ്കറാണെന്നും തന്റെ നിയമനം മുഖ്യമന്ത്രി അറിഞ്ഞുതന്നെ ആയിരുന്നെന്നും സ്വപ്ന ഇ.ഡിക്കു മൊഴി നല്‍കിയിട്ടുണ്ട്. 

എന്നാല്‍, സ്വപ്നയുടെ ഈ മൊഴി മുഖ്യമന്ത്രി നിഷേധിച്ചിരുന്നു. ഈ സാഹചര്യത്തില്‍ അദ്ദേഹവുമായി ബന്ധപ്പെട്ട സ്വപ്നയുടെ മൊഴികളുടെ വിശ്വാസ്യത പരിശോധിക്കേണ്ടത് ആവശ്യമാണെന്നാണ് അന്വേഷണ സംഘം പറയുന്നത്. കോണ്‍സുലേറ്റുമായി ബന്ധപ്പെട്ട എല്ലാ ആവശ്യങ്ങള്‍ക്കും ശിവശങ്കര്‍ കോണ്‍സുല്‍ ജനറലിന്റെ സെക്രട്ടറിയെന്ന നിലയില്‍ തന്നെ വിളിക്കുമായിരുന്നെന്നും സ്വപ്ന പറഞ്ഞിരുന്നു.

കോണ്‍സുലേറ്റുമായി ബന്ധപ്പെട്ട ഔദ്യോഗിക കാര്യങ്ങള്‍ക്ക് താനും അദ്ദേഹത്തെ വിളിക്കുമായിരുന്നു. അങ്ങനെയാണ് തങ്ങളുടെ ബന്ധം ദൃഢമായതെന്നും കോണ്‍സുലേറ്റും സര്‍ക്കാരും തമ്മിലുള്ള ചര്‍ച്ചയിലാണ് ശിവശങ്കറിനെ കാണുന്നതെന്നും സ്വപ്ന വെളിപ്പെടുത്തിയിട്ടുണ്ട്.