പയ്യന്നൂര്‍: തിരുവനന്തപുരം വിളപ്പില്‍ശാല മാലിന്യവിരുദ്ധ സമര നായിക എസ്. ശോഭനകുമാരി രാമന്തളി മാലിന്യ വിരുദ്ധ സമരപന്തലിലെത്തി. സമരത്തിന് ഐക്യദാര്‍ഢ്യവുമായി ജവഹര്‍ ബാലവേദി ജില്ലാ കമ്മിറ്റി സംഘടിപ്പിച്ച കുട്ടികളുടെ പ്രതിഷേധ ജ്വാല ഉദ്ഘാടനത്തിനാണ് ശോഭനകുമാരിയെത്തിയത്.
തിരുവനന്തപുരം കോര്‍പറേഷന്റെ മാലിന്യം വിളപ്പില്‍ശാല പഞ്ചായത്തില്‍ നിക്ഷേപിക്കുന്നതിനെതിരേ അന്നത്തെ വിളപ്പില്‍ശാല പഞ്ചായത്ത് പ്രസിഡന്റായ ശോഭനകുമാരിയുടെ നേതൃത്വത്തില്‍ നടന്ന സമരം ഏറെ ചര്‍ച്ചയായിരുന്നു. വിളപ്പില്‍ശാലയിലെ ജനങ്ങളെ അണിനിരത്തി സംസ്ഥാന സര്‍ക്കാരിനെതിരേയും തിരുവനന്തപുരം കോര്‍പറേഷനെതിരെയും നടത്തിയ സമരം ലക്ഷ്യം കണ്ടതിനു ശേഷമായിരുന്നു അവസാനിച്ചത്.
ഇരകള്‍ക്ക് എവിടെയും ഒരേ മുഖമാണെന്ന് ശോഭനകുമാരി പറഞ്ഞു. രാമന്തളി പോലെ വിളപ്പില്‍ശാലയിലും സ്ത്രീകളാണ് ഏറെ ദുരിതം അനുഭവിച്ചത്. കിണറുകള്‍ മലിനമായി. എവിടെയും അസുഖങ്ങള്‍.
പെണ്‍കുട്ടികള്‍ക്ക് വിവാഹം പോലും നടക്കാത്ത അവസ്ഥ. ഭരിക്കുന്നത് ആരെന്ന് നോക്കാതെയാണ് സമരം ചെയ്തത്.
പഞ്ചായത്ത് പ്രസിഡന്റായി തന്നെ തെരഞ്ഞെടുത്ത ജനങ്ങളുടെ താല്‍പര്യം മാത്രമെ നോക്കിയിരുന്നുള്ളുവെന്നും ശോഭനകുമാരി കൂട്ടിചേര്‍ത്തു. നിരാഹാരം അനുഷ്ഠിക്കുന്ന പി.പി പ്രേമനോടും വനിതാ സമരസമിതി പ്രവര്‍ത്തകരോടും നിലവില്‍ തിരുവനന്തപുരം ജില്ലാ പഞ്ചായത്തംഗം കൂടിയായ ശോഭനകുമാരി കാര്യങ്ങള്‍ ചോദിച്ചറിഞ്ഞു.