തിരുവനന്തപുരം: സംസ്ഥാനത്തെ ഇതര സര്‍വകലാശാലകള്‍ക്ക് വിദൂര വിദ്യാഭ്യാസ കോഴ്‌സുകള്‍ അനുവദിക്കാന്‍ സര്‍ക്കാര്‍. ഈ വര്‍ഷത്തെ ബിരുദ-ബിരുദാനന്തര കോഴ്‌സുകളില്‍ വിദൂര വിദ്യാഭ്യാസ പ്രവേശനം നടത്താനാണ് അനുമതി ലഭിക്കുക. സര്‍വകലാശാലകളിലെ വിദൂര വിദ്യാഭ്യാസം അവസാനിപ്പിച്ച ഓപണ്‍ സര്‍വകലാശാല ഓര്‍ഡിനന്‍സിലെ വ്യവസ്ഥ ഹൈക്കോടതി സ്റ്റേ ചെയ്ത സാഹചര്യത്തിലാണ് നടപടി. അഡ്വക്കറ്റ് ജനറലുമായുള്ള കൂടിയാലോചനയ്ക്ക് ശേഷം ഉന്നതവിദ്യാഭ്യാസ വകുപ്പ് ഹൈക്കോടതിയെ നിലപാട് അറിയിക്കും. 

 

ഓപണ്‍ സര്‍വകലാശാല പ്രവര്‍ത്തന സജ്ജമാകുന്നതിനും യു.ജി.സി അംഗീകാരം ലഭിക്കുന്നതിനും മുന്‍പ് ഇതര സര്‍വകലാശാലകളില്‍ നിലവിലുള്ള വിദൂര വിദ്യാഭ്യാസ കോഴ്‌സുകള്‍ നിര്‍ത്തലാക്കിയാല്‍ ഈ വര്‍ഷം വിദ്യാര്‍ഥികള്‍ എന്തു ചെയ്യുമെന്ന ചോദ്യം ഹൈക്കോടതി ഉന്നയിച്ചിരുന്നു. വിദ്യാര്‍ഥികളും രക്ഷിതാക്കളും സമാന്തര സ്ഥാപനങ്ങളും ഉള്‍പ്പെടെ നേരത്തെ ഇക്കാര്യത്തില്‍ ആശങ്ക അറിയിച്ചിട്ടുമുണ്ട്. ഈ സാഹചര്യത്തിലാണ് കോഴ്‌സുകള്‍ അനുവദിക്കുന്നതിന് സര്‍ക്കാര്‍ ഇപ്പോള്‍ തീരുമാനിച്ചിരിക്കുന്നത്. 

 

ഇതര സര്‍വകലാശാലകളിലെ വിദൂര വിദ്യാഭ്യാസം ഈ വര്‍ഷം കൂടി തുടരാനാണ് തീരുമാനം. ഓപണ്‍ സര്‍വകലാശാലാ ഓര്‍ഡിനന്‍സ് ഭേദഗതി ചെയ്‌തോ, പുതിയ ഉത്തരവിറക്കിയോ വിദൂര വിദ്യാഭ്യാസത്തിന് സര്‍വകലാശാലകള്‍ക്ക് അനുമതി നല്‍കും. ഇതര സര്‍വകലാശാലകള്‍ക്ക് വിദൂര വിദ്യാഭ്യാസം വിലക്കിക്കൊണ്ടുള്ള വ്യവസ്ഥയെ ഹൈക്കോടതി സ്റ്റേ ചെയ്തതോടെയാണ് സര്‍ക്കാര്‍ പുനരാലോചന നടത്തിയത്.

 

നവംബര്‍ 15ന് മുന്‍പ് ഓപണ്‍ സര്‍വകലാശാലയിലെ കോഴ്‌സുകളിലേക്ക് പ്രവേശന നടപടി പൂര്‍ത്തീകരിച്ചാല്‍ മതിയെന്നതാണ് വ്യവസ്ഥ. അതിനാല്‍ പുതിയ തീരുമാനം എടുത്താലും ഈ വര്‍ഷത്തെ പ്രവേശന നടപടികള്‍ക്ക് തടസമുണ്ടാകില്ലെന്നാണ് സര്‍ക്കാര്‍ വിലയിരുത്തല്‍. ഓപണ്‍ സര്‍വകലാശാല നടപടികളുമായി മുന്നോട്ടുപോകുന്നതിന് ഹൈക്കോടതി സ്റ്റേ തടസമാകില്ലെന്നും സര്‍ക്കാര്‍ കരുതുന്നു.