കൊല്ലം: സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ നാട്ടില്‍ കാലപത്തിനു ആഹ്വാനം ചെയ്യുകയാണെന്നു പ്രതിപക്ഷനേതാവ് രമേശ് ചെന്നിത്തല. കൊല്ലം ഡി.സി.സി നേതൃത്വത്തില്‍ നടത്തിയ കലക്‌ട്രേറ്റ് മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം.

കൂലി വരമ്പത്തെന്ന കോടിയേരിയുടെ പ്രസ്താവന ഇതിനുള്ള തെളിവാണ്. ഒരു രാഷ്ട്രീയ നേതാവിനു ചേരുന്ന വാക്കുകളല്ല കോടിയേരിയുടേത്. പിണറായിയുടെ പൊലിസ് നിഷ്‌ക്രിയമാണ്. കണ്ണൂരില്‍ സി.ഐ ഓഫസില്‍ പോലും സി.പി.എമ്മുകാര്‍ സത്യാഗ്രഹം നടത്തുകയാണ്. പൊലിസ് നിഷ്‌ക്രിയമാണെന്നതിന്റെ തെളിവാണ് കോടിയേരിയുടെ പ്രസ്താവനയിലൂടെ പുറത്തുവന്നതെന്നും അദ്ദേഹം പറഞ്ഞു.

സി.പി.എം ആഭ്യന്തര കലാപത്തിനാണ് ശ്രമിക്കുന്നത്്. കൊല്ലം കലക്‌ട്രേറ്റു വളപ്പിലുണ്ടായ സ്‌ഫോടത്തിനു പിന്നിലുള്ളവരെ കണ്ടെത്താന്‍പോലും പൊലിസിനു ഇതുവരെ കഴിഞ്ഞിട്ടില്ല. പൊലിസ് ഉദ്യോഗസ്ഥരരെ തലങ്ങുംവിലങ്ങും സ്ഥലംമാറ്റി അവരെ നിഷ്‌ക്രിയരാക്കുകയാണ്. പണ്ടു പറഞ്ഞതൊക്കെ പിണറായി വിഴുങ്ങുന്നു. പുതിയ സാമ്പത്തിക ഉപദേഷ്ടാവ് പാര്‍ട്ടിയുടെ നവലിബറല്‍ ആശയങ്ങള്‍ക്കെതിരാണെന്നും ഇവര്‍ പാര്‍ട്ടിക്കു ഭാരമാണെന്നും ഉപദേഷ്ടാക്കള്‍ സര്‍ക്കാരിനെ പ്രതിസന്ധിയിലാക്കിയതായും ചെന്നിത്തല പറഞ്ഞു.