തൃശൂര്‍: ബാങ്കുകളില്‍ അക്കൗണ്ട് തുടങ്ങുകയും എ.ടി.എം വഴി പണമിടപാടുകള്‍ പ്രോത്സാഹിപ്പിക്കുന്ന സാഹചര്യത്തില്‍ എ.ടി.എമ്മുകളില്‍ നിന്ന് പണം പിന്‍വലിക്കുന്നതിനും ബാങ്കുകളില്‍ പണം നിക്ഷേപിക്കുന്നതിനും മറ്റ് സര്‍വിസുകള്‍ക്കും അമിത ചാര്‍ജ് ഈടാക്കാനുള്ള എസ്.ബി.ഐയുടെ ശ്രമം വരുംകാലങ്ങളില്‍ ബാങ്കുകളില്‍ നിന്ന് സാധാരണക്കാരെ അകറ്റുന്നതിന് വഴിയൊരുക്കാന്‍ സാധ്യതയെന്ന്.
എസ്.ബി.ഐയുടെ ഈ നീക്കത്തിന് മറ്റു ചില ലക്ഷ്യങ്ങളുണ്ടെന്ന് സംശയിക്കുന്നു. നോട്ട് പ്രതിസന്ധി നേരിടുന്ന സാഹചര്യത്തില്‍ ജനങ്ങളെ ബുദ്ധിമുട്ടിലാക്കുകയാണ് ബാങ്ക്. വരുമാന വര്‍ധന മാത്രമാണ് എസ്.ബി.ഐയുടെ ലക്ഷ്യം.
സര്‍ക്കാരിലേക്കുള്ള നികുതികള്‍ ഓണ്‍ലൈനായി അടയ്ക്കുന്നതിന് ചുമതലപ്പെടുത്തിയ എസ്.ബി.ഐയുടെ നിലപാട് വ്യാപാരി സമൂഹത്തിന് ദോഷകരമായി ബാധിക്കും.
എസ്.ബി.ടിയെ എസ്.ബി.ഐയില്‍ ലയിപ്പിച്ചതോടെ വ്യാപാരികള്‍ക്ക് ഇ-പേമന്റിന് മറ്റ് സംവിധാനം ഇല്ലാതായി.
സംസ്ഥാന സര്‍ക്കാര്‍ വ്യാപാരികളുടെ ഓണ്‍ലൈന്‍ ടാക്‌സ് എസ് ബി ഐയില്‍ നിന്നും മാറ്റി ഇതര പൊതുമേഖല ബാങ്കുകളെ ഏല്‍പ്പിക്കണമെന്ന് കേരള വ്യാപാരി വ്യവസായി കോണ്‍ഫെഡറേഷന്‍ ചെയര്‍മാന്‍ കെ.എന്‍ മര്‍സൂക്കും കണ്‍വീനര്‍ ബിന്നി ഇമ്മട്ടിയും ആവശ്യപ്പെട്ടു.