ദുംക: ജാര്‍ഖണ്ഡിലെ ദുംകയില്‍ സുരക്ഷാ സൈനികരും മാവോയിസ്റ്റുകളുമായുണ്ടായ ഏറ്റുമുട്ടലില്‍ ഒരു സൈനികന്‍ മരിച്ചു. അസമിലെ സോനിത്പൂര്‍ സ്വദേശിയായ നീരജ് ഛേത്രിയാണ് മരിച്ചത്. നാലുപേര്‍ക്ക് പരുക്കേറ്റു. ഏറ്റുമുട്ടലില്‍ നാലോ അഞ്ചോ മാവോയിസ്റ്റുകള്‍ക്ക് പരുക്കേറ്റതായി ദുംക പൊലിസ് സൂപ്രണ്ട് വൈ.എസ് രമേശ് അറിയിച്ചു.
ശശസ്ത്ര സീമാ ബല്‍(എസ്.എസ്.ബി) ജവാനാണ് ജീവഹാനി നേരിട്ടത്. സംഭവത്തിന്റെ പശ്ചാത്തലത്തില്‍ ശക്തമായ സൈനിക വിന്യാസമാണ് മേഖലയില്‍ വരുത്തിയത്. സ്ഥിതിഗതികള്‍ നിരീക്ഷിച്ചുവരികയാണെന്ന് സുരക്ഷാ സൈന്യവും പൊലിസും അറിയിച്ചു.
അതിനിടയില്‍ പരുക്കേറ്റവരെ ഹെലികോപ്റ്റര്‍ മാര്‍ഗം റാഞ്ചിയിലെ ആശുപത്രിയിലേക്ക് മാറ്റി.
ഇന്നലെ പുലര്‍ച്ചെ 3.30നാണ് ശശസ്ത്ര സീമാ ബല്‍ സൈനികരും സംസ്ഥാന പൊലിസും സംയുക്തമായി നടത്തിയ നീക്കത്തിനിടയില്‍ മാവോയിസ്റ്റുകളുമായി ഏറ്റുമുട്ടലുണ്ടായത്.
മാവോയിസ്റ്റുകളുടെ സാന്നിധ്യം തിരിച്ചറിഞ്ഞതിനെ തുടര്‍ന്ന് ദുംകയില്‍ പരിശോധന നടത്തുന്നതിനിടയിലാണ് സംയുക്ത സേനക്കുനേരെ മാവോയിസ്റ്റുകള്‍ ആക്രമണം നടത്തിയത്.
ഇരുവിഭാഗവും ഏറെ നേരം വെടിവയ്പ് തുടര്‍ന്നതായും ഇതിനിടയിലാണ് ഒരു സൈനികന്‍ മരിച്ചതെന്നും ദുംക പൊലിസ് കമ്മിഷനര്‍ അറിയിച്ചു.