ഹരിപ്പാട്: കൊടിമരം തകര്‍ത്തതില്‍ പ്രതിഷേധിച്ച് നടത്തിയ പ്രകടനത്തിനിടെ പൊലിസും എസ്.എഫ്.ഐ പ്രവര്‍ത്തകരും തമ്മില്‍ സംഘര്‍ഷം. കാര്‍ത്തികപ്പളളി ഐ.എച്ച്.ആര്‍.ഡി കോളജിന് സമീപം സ്ഥാപിച്ചിരുന്ന എസ്.എഫ്.ഐയുടെ കൊടിമരം തകര്‍ത്തതില്‍ പ്രതിഷേധിച്ച് നടത്തിയ പ്രകടനമാണ് സംഘര്‍ഷത്തില്‍ കലാശിച്ചത്. സംഭവത്തില്‍ എസ്.എഫ്.ഐ കാര്‍ത്തികപ്പള്ളി ഏരിയ സെക്രട്ടറി അജ്മല്‍ (23), ജോയിന്റ് സെക്രട്ടറി സുബിന്‍ (23) എന്നിവര്‍ക്ക് പരുക്കേറ്റു. ഇരുവരും ഹരിപ്പാട് താലൂക്ക് ആശുപത്രിയില്‍ ചികിത്സയിലാണ്.
എസ്.എഫ്.ഐയുടെ കൊടിമരം തകര്‍ത്തശേഷം കെ.എസ്.യു പ്രവര്‍ത്തകര്‍ അവരുടെ കൊടിമരം സ്ഥാപിച്ചുവെന്നായിരുന്നു ആരോപണം. ഇതില്‍ പ്രതിഷേധിച്ച് നടത്തിയ പ്രകടനം വ്യാഴാഴ്ച 11.30ഓടെ വലിയകുളങ്ങര ഭാഗത്തെത്തിയപ്പോഴായിരുന്നു സംഘര്‍ഷമുണ്ടായത്. തങ്ങളെ മുന്നോട്ടുപോകാന്‍ അനുവദിക്കാതെ പ്രകടനം തടയുകയും മര്‍ദിക്കുകയുമായിരുന്നുവെന്ന് എസ്.എഫ്.ഐ പ്രവര്‍ത്തകര്‍ ആരോപിച്ചു. തുടര്‍ന്ന് മര്‍ദ്ദിച്ചതില്‍ പ്രതിഷേധിച്ച് കാര്‍ത്തികപ്പളളി ജങ്ഷനില്‍ ഒരു മണിക്കൂറോളം പ്രവര്‍ത്തകര്‍ റോഡ് ഉപരോധിച്ചു. കായംകുളം ഡിവൈ.എസ്.പി ആര്‍. ബിനുവുമായി നടന്ന ചര്‍ച്ചക്കൊടുവിലാണ് ഉപരോധം അവസാനിപ്പിച്ചത്. പ്രവര്‍ത്തകരെ മര്‍ദിച്ചിട്ടില്ലെന്നും വലിയകുളങ്ങരയില്‍ സ്ഥാപിച്ചിരുന്ന കോണ്‍ഗ്രസിന്റെ കൊടിമരം തകര്‍ക്കാന്‍ ശ്രമിച്ചപ്പോള്‍ തടയുക മാത്രമാണ് ചെയ്തതെന്നും കരീലകുളങ്ങര എസ്.ഐ ഷൈജു ഇബ്രാഹിം പറഞ്ഞു.