കോഴിക്കോട്: ഖാദര്‍ കമ്മിറ്റി റിപ്പോര്‍ട്ട് വേണ്ടത്ര ആലോചനകളില്ലാതെ പെട്ടെന്ന് നടപ്പാക്കിയ സര്‍ക്കാര്‍ നിലപാടിനെതിരേ ശക്തമായ ജനകീയ സമരം സംഘടിപ്പിക്കുമെന്ന് കെ.എസ്.യു സംസ്ഥാന പ്രസിഡന്റ് കെ.എം അഭിജിത്ത് വാര്‍ത്താസമ്മേളനത്തില്‍ പറഞ്ഞു. വിദ്യാര്‍ഥി സംഘടനകളുമായോ പ്രതിപക്ഷവുമായോ ചര്‍ച്ച ചെയ്യാതെയുള്ള അപൂര്‍ണമായ റിപ്പോര്‍ട്ടാണിത്. വിദ്യാഭ്യാസ രംഗത്ത് മികവുണ്ടാക്കാനുള്ള ഒരു കാര്യവും ഇതിലില്ല. എട്ടു മുതല്‍ 12 വരെ ക്ലാസുകളെ ഒരുമിപ്പിച്ചുള്ള ഘടനാമാറ്റം വിദ്യാഭ്യാസ അവകാശത്തിന്റെ ലംഘനമാണ്. ഇതിനെതിരേ ജനകീയമായ സമരത്തിന് കെ.എസ്.യു തുടക്കമിട്ടതായും അഭിജിത്ത് സൂചിപ്പിച്ചു. കേന്ദ്രം കൊണ്ടുവന്ന പുതിയ കരട് വിദ്യാഭ്യാസ നയത്തിനോടും കെ.എസ്.യുവിന് യോജിപ്പില്ലെന്നും അഭിജിത്ത് കൂട്ടിച്ചേര്‍ത്തു.