നിലമ്പൂര്‍: ടിപ്പര്‍ ലോറി മരത്തിലിടിച്ച് മറിഞ്ഞ് രണ്ട് പേര്‍ക്ക് പരുക്കേറ്റു. പരുക്കേറ്റ കാട്ടുമുണ്ട വാഴമ്പറ്റ ഷിബിന്‍ (21), നടുവക്കാട് ഇല്ലിക്കല്‍ ഫൗസാന്‍(21) എന്നിവരെ പെരിന്തല്‍മണ്ണ സ്വകാര്യആശുപത്രിയില്‍ പ്രവേശിപ്പിച്ചു. ഇന്നലെ പുലര്‍ച്ചെ 4.50തോടെ വെളിയംതോട് ജവഹര്‍ കോളനിക്ക് മുന്നിലാണ് കാട്ടുപന്നി കുറുകെ ചാടിയതിനെ തുടര്‍ന്ന് നിയന്ത്രണം വിട്ട ടിപ്പര്‍ ലോറി മരത്തിലിടിച്ച് മറിഞ്ഞത്. ലോറിയും ഭാഗികമായി തകര്‍ന്നു.
അതുവഴിയെത്തിയ ഹൈവേ പൊലിസാണ് അപകടത്തില്‍ പെട്ടവരെ ജില്ലാ ആശുപത്രിയില്‍ എത്തിച്ചത്. തുടര്‍ന്നാണ് പെരിന്തല്‍മണ്ണയിലേക്ക് റഫര്‍ ചെയ്തത്. കാലിനും മറ്റും സാരമായി പരുക്കേറ്റിട്ടുണ്ട്