മലപ്പുറം: ജില്ലയില്‍ അനധികൃതമായി പ്രവര്‍ത്തിക്കുന്ന ജിംനേഷ്യങ്ങള്‍ക്കതിരേ നടപടി സ്വീകരിക്കുമെന്നു ജില്ലാ കലക്ടര്‍ അമീത് മീണ. ജില്ലയിലെ സ്‌പോര്‍ട്‌സ് അസോസിയേഷനുകളുടെ പ്രവര്‍ത്തനങ്ങള്‍ വിലയിരുത്തുന്ന യോഗത്തില്‍ അധ്യക്ഷനായി സംസാരിക്കുകയായിരുന്നു അദ്ദേഹം.
ജിംനേഷ്യങ്ങള്‍ ഏറ്റവും കൂടുതലുള്ള ജില്ലയില്‍ കേരളാ ബോഡി ബില്‍ഡിങ് അസോസിയേഷന്റെ അനുമതിയില്ലാതെ എഴുപതോളം സ്ഥാപനങ്ങള്‍ പ്രവര്‍ത്തിക്കുന്നുണ്ടെന്നാണ് കണക്കാക്കുന്നത്. ഇത്തരം സ്ഥാപനങ്ങളില്‍ പരിശീലനം ലഭിക്കുന്നവരുടെ സര്‍ട്ടഫിക്കറ്റുകള്‍ക്ക് അംഗീകാരമുണ്ടാകില്ല. ജോലിക്കും ഗ്രേസ് മാര്‍ക്കിനും ഗുണം ചെയ്യുന്നില്ല. ഇതറിയാതെ നിരവധി പേര്‍ ഇത്തരം സ്ഥാപനങ്ങളില്‍ പരിശിലനം നേടി വഞ്ചിക്കപ്പെടുന്നതായി അസോഷിയേഷന്‍ ഭാരവാഹികള്‍ അറിയിച്ചു. ഇത്തരം സ്ഥാപനങ്ങളുടെ ലിസ്റ്റ് തയാറാക്കി സമര്‍പ്പിക്കാന്‍ സ്‌പോര്‍ട്‌സ് കൗണ്‍സിലിനു കലക്ടര്‍ നിര്‍ദേശം നല്‍കി.
കലക്ടറേറ്റില്‍ നടന്ന യോഗത്തില്‍ കൗണ്‍സില്‍ ജില്ലാ പ്രസിഡന്റ് പി. ശംസുദ്ദീന്‍, ജില്ലാ സ്‌പോര്‍ട്‌സ് ഓഫിസര്‍ പി.എസ് വീരാന്‍കുട്ടി, സെക്രട്ടറി പി. ഗീത സംസാരിച്ചു.