ഗൂഡല്ലൂര്‍: കടുവാ ഭീതി ഒഴിയാതെ നെല്ലാക്കോട്ട പഞ്ചായത്തിലെ വിലങ്ങൂര്‍ ഗ്രാമം. കഴിഞ്ഞദിവസം പ്രദേശത്തെ ജനവാസ കേന്ദ്രത്തിന് സമീപത്തെ പുല്‍മേടില്‍ നാട്ടുകാര്‍ കടുവയെ കണ്ടതോടെയാണ് ഭീതി ഇരട്ടിച്ചത്. തുടര്‍ന്ന് നാട്ടുകാര്‍ വിവരമറിയിച്ചതിനെ തുടര്‍ന്ന് സ്ഥലത്തെത്തി വനപാലകര്‍ പടക്കം പൊട്ടിച്ച് കടുവയെ വനത്തിലേക്ക് തുരത്തുകയായിരുന്നു. നേരത്തെ പ്രദേശത്തേയും സമീപ പ്രദേശങ്ങളായ റോക്ക് വുഡ്, സുസന്‍പാടി, ചോലാടി, ഒമ്പതാം മൈല്‍ എന്നിവിടങ്ങളില്‍ വളര്‍ത്തുമൃഗങ്ങളെ കടുവ ആക്രമിച്ചുകൊന്നിരുന്നു. കൂടാതെ തൊട്ട അയല്‍ പ്രദേശമായ വുഡ് ബ്രയര്‍ എസ്റ്റേറ്റില്‍ വെച്ച് വടക്കേന്ത്യന്‍ തൊഴിലാളിയേയും ബിതര്‍ക്കാട് തേയില തോട്ടത്തില്‍ വെച്ച് ഒരു സ്ത്രീ തൊഴിലാളിയേയും കടുവ ആക്രമിച്ചു കൊന്നിരുന്നു.