തൊടുപുഴ: ''എനിക്കൊരു ഡോക്ടറാകണം'' വിലകുറഞ്ഞ പ്ലാസ്റ്റിക് ഷീറ്റ് കൊണ്ട് നിര്‍മിച്ച ഒറ്റമുറി വീട്ടില്‍ മണ്ണെണ്ണവിളക്കിന്റെ അരണ്ട വെളിച്ചത്തില്‍ എസ്.എസ.്എല്‍.സിക്ക് തയാറെടുക്കുമ്പോള്‍ അനന്തു മനസില്‍ കുറിച്ചിട്ടു.
ദരിദ്ര ചുറ്റുപാടുകളെ തരണം ചെയ്ത് എസ്എസ്എല്‍സിക്ക് എല്ലാ വിഷയത്തിനും എ പ്ലസ് നേടിയ അനന്തു മനോജിന്റെ വിജയത്തിന് പത്തരമാറ്റിന്റെ തിളക്കമുണ്ട്.
പെരിങ്ങാശേരി ട്രൈബല്‍ ഹയര്‍ സെക്കന്‍ഡറി സ്‌കൂളില്‍ പരീക്ഷയെഴുതിയ 46പേരില്‍ എല്ലാ വിഷയത്തിനും എ പ്ലസ് നേടിയ ഏക വിദ്യാര്‍ഥി. ആറാം തവണയും നൂറുമേനി ജയം നേടിയ സ്‌കൂളിന്റെ അഭിമാനതാരം.ദാരിദ്ര്യമകറ്റാന്‍ നേരം വെളുക്കുമ്പോള്‍ പത്രക്കെട്ടുമായി വീടുകളിലേക്ക് ഓടുകയാണ് അനന്തു. മാതാപിതാക്കളുടെ കഷ്ടപ്പാട് മനസിലാക്കി ഇടയ്‌ക്കൊക്കെ കൂലിപ്പണിക്കുമിറങ്ങും. പെരിങ്ങാശേരി ബൗണ്ടറി ഭാഗത്ത് കളപ്പുരയ്ക്കല്‍ മനോജിന്റെയും ബിന്ദുവിന്റെയും രണ്ടുമക്കളില്‍ ഇളയവനാണ് അനന്തു.
ചെറുപ്പം മുതല്‍ പഠനത്തില്‍ കേമന്‍. ട്യൂഷനില്ലാതെയാണ് ഇക്കാലമത്രയും പഠിച്ചത്. ലോട്ടറി വില്‍പനക്കാരനാണ് അച്ഛന്‍. അമ്മ ബിന്ദു വല്ലപ്പോഴും കൂലിപ്പണിക്കുപോകും. മൂത്തമകള്‍ അനശ്വര രോഗിയാണ്. ദിവസേന നൂറുരൂപയുടെ മരുന്നുവേണം.
പിതൃസ്വത്തായി ലഭിച്ച പട്ടിയമില്ലാത്ത രണ്ടുസെന്റിലെ കൂരയിലാണ് നാലുപേരടങ്ങുന്ന കുടുംബത്തിന്റെ ജീവിതം. ജീവിതത്തിന്റെ രണ്ടറ്റവും കൂട്ടിമുട്ടിക്കാന്‍ മാതാപിതാക്കള്‍ കഷ്ടപ്പെടുന്നത് കണ്ട അനന്ദു തനിക്കു പറ്റുന്ന പണികളും ഇതിനിടയില്‍ ചെയ്യുന്നു.പുലര്‍ച്ചെ അഞ്ചിന് എഴുന്നേറ്റ് പത്രവിതരണത്തിന് പോകും. ഒഴിവുദിവസങ്ങളില്‍ അടുത്ത പുരയിടങ്ങളില്‍ ശേഷിക്കനുസരിച്ച് കൂലിപ്പണിക്കും പോകും. തുച്ഛവരുമാനത്തിന്റെ ഓഹരി വീട്ടിലേയ്ക്കും നല്‍കും.
അറിവും വായനാശീലവും വര്‍ധിക്കാനുള്ള മാര്‍ഗങ്ങളൊന്നും ഒഴിവാക്കാറില്ല. പത്രവിതരണത്തിനൊപ്പം എല്ലാ പത്രങ്ങളും വായിക്കും. ''സയന്‍സ് ഗ്രൂപ്പെടുത്ത് മാതൃവിദ്യാലയത്തില്‍ തന്നെ ഞാന്‍ തുടര്‍ന്നും പഠിക്കും..ഞാനൊരു ഡോക്ടറാകും ചേട്ടാ...'' അനന്തുവിന്റെ കണ്ണുകളില്‍ നിശ്ചയദാര്‍ഡ്യത്തിന്റെ തിളക്കം.