മോസ്‌കോ: റഷ്യയില്‍ മാധ്യമപ്രവര്‍ത്തകനെ അറസ്റ്റ് ചെയ്തതുമായി ബന്ധപ്പെട്ട് പ്രതിഷേധിച്ച 400 പേരെ അറസ്റ്റ് ചെയ്തു. അറസ്റ്റിന് പിന്നില്‍ പ്രവര്‍ത്തിച്ച പൊലിസുകാരെ ശിക്ഷിക്കണമെന്ന് ആവശ്യപ്പെട്ട് മോസ്‌കോവില്‍ പ്രതിഷേധിച്ചവരെയാണ് പൊലിസ് ഇന്നലെ അറസ്റ്റ് ചെയ്തത്. മയക്കുമരുന്ന് കേസില്‍ സ്വതന്ത്ര മാധ്യമപ്രവര്‍ത്തകന്‍ അലക്‌സി ഗുലൂനോവിനെയാണ് വ്യാഴാഴ്ച അറസ്റ്റ് ചെയ്തത്. കുറ്റം തെളിയിക്കാന്‍ സാധിക്കാത്തതിനാല്‍ ഇദ്ദേഹത്തെ കഴിഞ്ഞ ദിവസം വിട്ടയച്ചിരുന്നു. മോസ്‌കോ നഗരത്തിലെ സര്‍ക്കാര്‍ വൃത്തങ്ങളുമായി ബന്ധപ്പെട്ടുള്ള അഴിമതികള്‍ ഇദ്ദേഹം പുറത്തുവിട്ടിരുന്നു. ഇതിനുള്ള പ്രതികാരമാണ് അറസ്റ്റെന്നാണ് മനുഷ്യാവകാശ സംഘടനകളുടെ വാദം.