നീലേശ്വരം: അടിച്ചാല്‍ തിരിച്ചടിക്കുമെന്ന് സി.പി.എം സംസ്ഥാന കമ്മിറ്റി അംഗം എം.വി ജയരാജന്‍. സി.പി.എം നീലേശ്വരത്ത് സംഘടിപ്പിച്ച സ്‌നേഹസംഗമം ഉദ്ഘാടനം ചെയ്യുകയായിരുന്നു അദ്ദേഹം. ആത്മരക്ഷയ്ക്കുവേണ്ടിയുള്ള പ്രതിരോധമാണത്. ഇത് കമ്യൂണിസ്റ്റുകാരുടെ ഭരണഘടനയില്‍പറഞ്ഞ കാര്യമാണ്. വാളെടുത്തു വരുന്നവനോട് വാ മോനേ ജ്യൂസ് കുടിച്ചുപോകാം എന്നുപറയുന്ന പാരമ്പര്യം കമ്യൂണിസ്റ്റിനില്ല. സംസ്ഥാന സെക്രട്ടറിയുടെ പയ്യന്നൂര്‍ പ്രസംഗത്തിന്റെ പേരില്‍ പാര്‍ട്ടി മാപ്പുപറയുമെന്നത് വ്യാമോഹമാണ്.
മുസ്‌ലിംകളെല്ലാം ഭീകരരല്ല. അതുപോലെ ഹിന്ദുക്കളെല്ലാം ആര്‍.എസ്.എസുമല്ല. മതത്തെയോ മതവിശ്വാസത്തെയോ ഒറ്റപ്പെടുത്തേണ്ടതില്ല. ഭീകരവാദത്തെയാണ് ഒറ്റപ്പെടുത്തേണ്ടത്. സ്‌നേഹത്തിന്റെയും കാരുണ്യത്തിന്റെയും മതമാണ് ഇസ്‌ലാം. അവര്‍ക്കു ഭീകരവാദികളാകാനാവില്ല. ഐ.എസും ആര്‍.എസ്.എസും പരസ്പരപൂരകങ്ങളാണ്. മതസൗഹാര്‍ദത്തിനു പേരുകേട്ട നാട്ടില്‍ ഭീകരവാദം അനുവദിക്കില്ലെന്നും അദ്ദേഹം പറഞ്ഞു.