തിരുവനന്തപുരം: വരുന്ന തെരഞ്ഞെടുപ്പുകള്‍ മുന്നില്‍ക്കണ്ട് വോട്ട് ബാങ്ക് ലക്ഷ്യം വച്ച് വീണ്ടും ശമ്പള കമ്മിഷനെ നിയമിച്ച് സര്‍ക്കാര്‍ ബാധ്യത കൂട്ടുന്നു. ഇപ്പോള്‍ തന്നെ ആകെ തുകയുടെ 45 ശതമാനവും ശമ്പളവും പെന്‍ഷനും നല്‍കാന്‍ വേണം.
കഴിഞ്ഞ ശമ്പള കമ്മിഷന്‍ ശുപാര്‍ശ പ്രകാരം 7,600 കോടി രൂപയാണ് അധികം നല്‍കേണ്ടി വന്നത്. പത്തു വര്‍ഷത്തിലൊരിക്കല്‍ ശമ്പള കമ്മിഷനെ വച്ച് പുനഃപരിശോധിച്ചാല്‍ മതിയെന്ന കഴിഞ്ഞ കമ്മിഷന്റെ ശുപാര്‍ശ തള്ളി മുഖ്യമന്ത്രി പിണറായി വിജയന്റെ നിര്‍ദേശ പ്രകാരം ശമ്പള കമ്മിഷന്‍ അഞ്ചുവര്‍ഷമാക്കി മാറ്റിയിരുന്നു.
കഴിഞ്ഞ ലോക്‌സഭാ തെരഞ്ഞെടുപ്പില്‍ പോസ്റ്റല്‍ വോട്ടില്‍ സി.പി.എമ്മിന് ആധിപത്യം ഉറപ്പിക്കാന്‍ കഴിഞ്ഞില്ല. സര്‍ക്കാര്‍ ഉദ്യോഗസ്ഥരില്‍ 70 ശതമാനവും യു.ഡി.എഫിനെ തുണച്ചു. ഇത് മറികടക്കാനാണ് പുതിയ ശമ്പള കമ്മിഷനെ വച്ച് സര്‍ക്കാര്‍ ഉദ്യോഗസ്ഥരുടെ വോട്ട് ബാങ്ക് ഉറപ്പിക്കാന്‍ നോക്കുന്നത്. സര്‍ക്കാരിന്റെ കാലാവധി അവസാനിക്കാന്‍ ഇനി രണ്ടുവര്‍ഷമാണ് ബാക്കി. തെരഞ്ഞെടുപ്പിന് തൊട്ടുമുമ്പ് പ്രഖ്യാപിക്കുന്ന തരത്തിലായിരിക്കും കമ്മിഷന്റെ പ്രവര്‍ത്തനം. പുതിയ ശമ്പള കമ്മിഷന്‍ വരുമ്പോള്‍ ഏതാണ്ട് 15,000 കോടിയോളം അധിക ചെലവ് വരും. ഇത് അടുത്ത സര്‍ക്കാരിന്റെ തലയിലാകും. കടം കൊണ്ട് മൂടിയ കേരളം കടം തിരിച്ചടക്കാതെ ബാധ്യതകള്‍ കൂട്ടുമ്പോള്‍ വികസന പ്രവര്‍ത്തനങ്ങള്‍ മുരടിക്കുമെന്ന് സാമ്പത്തിക വിദഗ്ധര്‍ തന്നെ പറയുന്നു.