ന്യൂഡല്‍ഹി: ബിഹാര്‍ തെരഞ്ഞെടുപ്പിനൊപ്പം 11 സംസ്ഥാനങ്ങളിലേക്ക് നടന്ന ഉപതെരഞ്ഞെടുപ്പില്‍ 58ല്‍ 40 സീറ്റുകളിലും ബി.ജെ.പിക്ക് ലീഡ്.

ഏറ്റവും കൂടുതല്‍ സീറ്റുകളിലേക്ക് തെരഞ്ഞെടുപ്പ് നടന്ന മധ്യപ്രദേശില്‍ (28) 20 സീറ്റുകളില്‍ ബി.ജെ.പി ലീഡ് നേടി. ഭരണം തിരിച്ചുപിടിക്കാന്‍ പോരാടിയ കോണ്‍ഗ്രസിന് ഏഴ് സീറ്റില്‍ മാത്രമാണ് മുന്നേറാനായത്.

ബി.ജെ.പി ഭരിക്കുന്ന ഗുജറാത്തില്‍ എട്ടില്‍ എട്ട് സീറ്റിലും അവര്‍ മുന്നേറുകയാണ്. ഉത്തര്‍പ്രദേശില്‍ ഉപതെരഞ്ഞെടുപ്പ് നടക്കുന്ന ഏഴ് സീറ്റുകളില്‍ ആറിടത്തും ബി.ജെ.പി മുന്നേറ്റമാണ്. ഒരു സീറ്റില്‍ സമാജ്‌വാദി പാര്‍ട്ടി സ്ഥാനാര്‍ഥി ലീഡ് ചെയ്യുന്നു. ഛത്തിസ്ഗഡിലും ഹരിയാനയിലും തെരഞ്ഞെടുപ്പ് നടന്ന ഓരോ സീറ്റുകളില്‍ കോണ്‍ഗ്രസ് സ്ഥാനാര്‍ഥികള്‍ മുന്നേറുകയാണ്.

മണിപ്പൂരില്‍ വോട്ടെണ്ണല്‍ പുരോഗമിക്കവേ രണ്ട് സീറ്റില്‍ വിജയിച്ച ബി.ജെ.പി രണ്ട് സീറ്റുകളില്‍ ലീഡ് ചെയ്യുന്നു. ഒരു സീറ്റില്‍ സ്വതന്ത്രന്‍ വിജയിച്ചു. ഝാര്‍ഖണ്ഡില്‍ ഒരിടത്ത് ബി.ജെ.പിയും ഒരിടത്ത് കോണ്‍ഗ്രസും ലീഡ് ചെയ്യുന്നു. കര്‍ണാടകയിലെ സിറ, ആര്‍.ആര്‍ നഗര്‍ സീറ്റുകളില്‍ ബി.ജെ.പി മുന്നേറ്റം തുടരുന്നു. ഒഡീഷയില്‍ രണ്ട് സീറ്റില്‍ ബി.ജെ.ഡി ലീഡ് നേടി.

തെലങ്കാനയില്‍ മുഖ്യമന്ത്രി ചന്ദ്രശേഖരറാവുവിന്റെ തെലങ്കാന രാഷ്ട്ര സമിതിയുടെ (ടി.ആര്‍.എസ്) സിറ്റിങ് സീറ്റായ ദുബ്കയില്‍ ബി.ജെ.പി അപ്രതീക്ഷിത വിജയത്തിലേക്ക് കുതിക്കുകയാണ്.