കോഴിക്കോട്: ന്യൂനപക്ഷ വിഭാഗങ്ങളുടെ സാമൂഹിക ഉന്നമനത്തിനായി വിവാഹപൂര്‍വ സൗജന്യ കൗണ്‍സലിങ് പദ്ധതിയുടെ സംസ്ഥാനതല ഉദ്ഘാടനം ന്യൂനപക്ഷ ക്ഷേമ മന്ത്രി ഡോ. കെ.ടി. ജലീല്‍ നിര്‍വഹിച്ചു.
മതപരമായ കാര്യങ്ങളല്ല സൗജന്യ കൗണ്‍സലിങ്ങില്‍ നല്‍കുന്നതെന്നും ന്യൂനപക്ഷ വിഭാഗങ്ങള്‍ക്ക് മാത്രമല്ല, അപേക്ഷിക്കുന്ന എല്ലാവര്‍ക്കും സേവനം ലഭ്യമാകുമെന്നും മന്ത്രി പറഞ്ഞു. വിവാഹത്തിന് പ്രീ മാരിറ്റല്‍ സര്‍ട്ടിഫിക്കറ്റ് കൂടി വേണമെന്ന് തീരുമാനിച്ചാല്‍ ഉചിതമായിരിക്കുമെന്നും എന്നാല്‍, നിര്‍ബന്ധമാക്കരുതെന്നും മന്ത്രി കൂട്ടിച്ചേര്‍ത്തു.
എ. പ്രദീപ് കുമാര്‍ എം.എല്‍.എ അധ്യക്ഷത വഹിച്ചു. കെ.എസ്.എം.ഡി. എഫ്.സി ചെയര്‍മാന്‍ പ്രൊഫ. എ.പി. അബ്ദുല്‍ വഹാബ് മുഖ്യ പ്രഭാഷണം നടത്തി. പ്രൊഫ. മോനമ്മ കൊക്കാട് രചിച്ച ന്യൂനപക്ഷ അവകാശങ്ങള്‍ എന്ന കൃതി സി.പി. കുഞ്ഞു മുഹമ്മദിന് നല്‍കി മന്ത്രി പ്രകാശനം ചെയ്തു.സമൂഹത്തിന്റെയും കുടുംബത്തിന്റെയും സുസ്ഥിതിയും കെട്ടുറപ്പുമാണ് പദ്ധതികൊണ്ട് ലക്ഷ്യമിടുന്നത്. മുസ്‌ലിം, ക്രിസ്ത്യന്‍, ജൈന, ബുദ്ധ, പാര്‍സി, സിഖ് എന്നീ ന്യൂനപക്ഷ സമുദായങ്ങള്‍ക്ക് ഈ സേവനം ഉപയോഗപ്പെടുത്താം.
കാലിക്കറ്റ് യൂനിവേഴ്‌സിറ്റി സോഷ്യോളജി വകുപ്പും തിരുവനന്തപുരം ലയോള കോളജ് സൈക്കോളജി വകുപ്പും ചേര്‍ന്നാണ് സിലബസ് തയാറാക്കിയത്.
ദാമ്പത്യജീവിതത്തിലെ മുന്നൊരുക്കങ്ങള്‍, സന്തുഷ്ടകുടുംബജീവിതം, വിവാഹത്തിലെ നിയമ സദാചാര വശങ്ങള്‍, വിവാഹശേഷമുള്ള പഠനവും തൊഴിലും, ദമ്പതികളുടെ മനസ്സും ശരീരവും എന്നിവ അടങ്ങിയതാണ് സിലബസ്. സംസ്ഥാനത്താകെ 64 കേന്ദ്രങ്ങള്‍ അനുവദിച്ചിട്ടുണ്ട്.
കോച്ചിങ് സെന്റര്‍ ഫോര്‍ മൈനോരിറ്റി യൂത്ത് പ്രിന്‍സിപ്പല്‍മാരാണ് ജില്ലാതലത്തില്‍ ക്യാംപ് കോര്‍ഡിനേറ്റ് ചെയ്യുന്നത്. 18 വയസ്സ് തികഞ്ഞ സ്ത്രീകള്‍ക്കും 21 വയസ്സ് കഴിഞ്ഞ പുരുഷന്‍മാര്‍ക്കും കൗണ്‍സലിങ്ങില്‍ പങ്കെടുക്കാം. ചടങ്ങില്‍ കോര്‍പ്പറേഷന്‍ കൗണ്‍സിലര്‍ ബിജുലാല്‍, ഡോ. പി.സി അന്‍വര്‍, കടക്കല്‍ അബ്ദുല്‍ അസീസ് മൗലവി, ഡോ. ഹുസൈന്‍ മടവൂര്‍, ഹുസൈന്‍ രണ്ടത്താണി, മൈനോറിറ്റി വെല്‍ഫയര്‍ ഡയരക്ടര്‍ ഡോ. മൊയ്തീന്‍ കുട്ടി, സി.സി.എം. വൈസ് പ്രിന്‍സിപ്പല്‍ പ്രൊഫ. അബ്ദുറഹിമാന്‍ തുടങ്ങിയവര്‍ പങ്കെടുത്തു.