ന്യൂഡല്‍ഹി: പ്രളയത്തില്‍ കേടുപാടുകളുണ്ടായ ദേശീയപാതകളുടെ പുനര്‍നിര്‍മാണത്തിന് കേന്ദ്ര സര്‍ക്കാര്‍ 121.10 കോടി രൂപ കേരളത്തിനു നല്‍കിയതായി കേന്ദ്ര ഗതാഗത മന്ത്രി നിതിന്‍ ഗഡ്കരി. ആന്റോ ആന്റണി എം.പിയുടെ ചോദ്യത്തിനു ലോക്‌സഭയില്‍ മറുപടി നല്‍കുകയായിരുന്നു മന്ത്രി. സംസ്ഥാനത്തെ വിവിധ ദേശീയപാതകളിലെ 123 കിലോമീറ്റര്‍ ദുരം ബലപ്പെടുത്തുന്നതിനായി 2018-19 കാലയളവില്‍ 188.53 കോടി രൂപയും നല്‍കി. പ്രളയക്കെടുതിയില്‍ കേടുപാടുകളുണ്ടായ റോഡുകള്‍ പുനര്‍നിര്‍മിക്കുന്നതിനായി കേരള സര്‍ക്കാരിന്റെ പക്കല്‍ നിന്ന് പ്രത്യേകമായി ഒരു നിവേദനവും ലഭിച്ചിട്ടില്ലെന്നും മന്ത്രി അറിയിച്ചു. 2014 മുതല്‍ 2019 വരെയുള്ള കഴിഞ്ഞ അഞ്ചു വര്‍ഷക്കാലയളവില്‍ സംസ്ഥാനത്തെ ദേശീയപാതകളുടെ വികസനത്തിനായി യഥാക്രമം 67.18, 132.24, 259.89, 171.14, 280.45 കോടി രൂപാ വീതവും, സംസ്ഥാനത്തെ റോഡുകളുടെ വികസനത്തിനായി കേന്ദ്ര റോഡു ഫണ്ടില്‍ നിന്ന് യഥാക്രമം 53.65, 59.88, 150.37, 132.69, 135.34 കോടി രൂപാ വീതവും അനുവദിച്ചതായും മന്ത്രി മറുപടി നല്‍കി.