ചുള്ളിയോട്: നെന്‍മേനി പഞ്ചായത്ത് ഭരണം അവതാളത്തിലെന്ന് യു.ഡി.എഫ് ആരോപണം.
മൂന്ന് വര്‍ഷത്തെ പഞ്ചായത്ത് ഭരണ പരാജയം മറച്ചുവെക്കാന്‍ ഇപ്പോള്‍ യു.ഡി.എഫിനെതിരേ കള്ളക്കഥകള്‍ പ്രചരിപ്പിക്കുകയാണ് ഭരണസമിതിയെന്നും യു.ഡി.എഫ് മെമ്പര്‍മാര്‍ ആരോപിച്ചു. സ്വകാര്യ മൊബൈല്‍ കമ്പനി കേബിള്‍ സ്ഥാപിക്കുന്നത് പൂര്‍ത്തീകരണത്തിലെത്താറായപ്പോള്‍ അനധികൃതമാണെന്ന് കണ്ടെത്തിയതിനാലാണ് പ്രവൃത്തി തടഞ്ഞത്. അതിനാല്‍ 18 ലക്ഷത്തില്‍പരം രൂപ പഞ്ചായത്തിന് ലഭിച്ചെന്നും ഇവര്‍ അവകാശപ്പെട്ടു. ഭരണസമിതി പ്രവര്‍ത്തിക്ക് മൗനാനുവാദം നല്‍കിയത് അഴിമതിക്കാണെന്നും അവര്‍ ആരോപിച്ചു. ഇത് അന്വേഷിക്കണം എന്നാവശ്യപ്പെട്ടാണ് പ്രതിപക്ഷം മുന്നോട്ട് വന്നത്. നിസാര തകരാറുകള്‍ മാത്രമുള്ള പഞ്ചായത്ത് ജീപ്പ് വര്‍ക്ക്‌ഷോപ്പില്‍ കയറ്റി തകരാറുകള്‍ പരിഹരിക്കാതെ ആഡംബര വാഹനം വാടകക്കെുത്ത് നാലു മാസം കൊണ്ട് ഒരു ലക്ഷം രൂപയോളം വാടക ഇനത്തില്‍ ഈ ഭരണസമിതി നഷ്ടപ്പെടുത്തി. പ്രളയക്കെടുതിയില്‍ പ്രതിസന്ധിയിലായ ജില്ലയില്‍ പത്ത് ലക്ഷം രൂപ മുടക്കി പുതിയ വാഹനം വാങ്ങുന്ന ഭരണസമിതിയുടെ തീരുമാനത്തോട് യോചിക്കാത്തതാണ് ഇവര്‍ പ്രതിപക്ഷത്തിനെതിരേ തിരിയാന്‍ കാരണം.
ക്ഷേമ പെന്‍ഷനുള്ള ആയിരത്തില്‍പരം അപേക്ഷകര്‍ക്ക് ഒന്നര വര്‍ഷമായി പെന്‍ഷന്‍ ലഭിക്കുന്നില്ല. തെരുവ് വിളക്കുകള്‍ കണ്ണടച്ചിട്ട് മൂന്ന് വര്‍ഷമായി, നന്നാക്കാനോ പുതിയവ സ്ഥാപിക്കാനോ ഇന്നുവരെ കഴിഞ്ഞിട്ടില്ല. സമ്പൂര്‍ണ ഭവന പദ്ധതിയില്‍ (ലൈഫ്) 85 വീടുകള്‍ മാത്രം അനുവദിച്ച് ഏറ്റവും പിന്നിലായ പഞ്ചായത്തായി. കഴിഞ്ഞ വര്‍ഷങ്ങളില്‍ റോഡുകള്‍ക്ക് വകയിരുത്തിയ ഫണ്ടുകള്‍ ചിലവഴിക്കാതെ തുക നഷ്ടപ്പെട്ടു. ചെക്ക്ഡാമുകള്‍, കുടിവെള്ള വദ്ധതികള്‍, തടയണകള്‍ തുടങ്ങി നിരവധി പദ്ധതികള്‍ തുടങ്ങിയില്ല.
കഴിഞ്ഞ ബജറ്റില്‍ പ്രഖ്യാപിച്ച 139 പദ്ധതികളില്‍ നാമമാത്രമാണ് തുടങ്ങിയത്. പെയിന്‍ ആന്‍ഡ് പാലിയേറ്റീവിലേക്ക് രണ്ട് വര്‍ഷം മുന്‍പ് വാര്‍ഡുകളില്‍ നിന്ന് പിരിച്ചെടുത്ത രണ്ടേമുക്കാല്‍ ലക്ഷം രൂപ രോഗികള്‍ക്ക് വിതരണം ചെയ്തിട്ടില്ല. വന്യമൃഗശല്യം, കൃഷി നാശം തൊഴിലില്ലായ്മ, വികസന മുരടിപ്പ് തുടങ്ങിയുള്ള പ്രതിസന്ധി കാരണം നിത്യവൃത്തിക്ക് പോലും മാര്‍ഗമില്ലാത്ത ജനങ്ങളെ പിഴിയുന്ന നിലപാട് അവസാനിപ്പിക്കണമെന്നും യു.ഡി.എഫ് പഞ്ചായത്ത് കമ്മിറ്റി ആവശ്യപ്പെട്ടു. കെ.സി.കെ തങ്ങള്‍ അധ്യക്ഷനായി. പി.എം റഫീക്ക്, യു.കെ പ്രേമന്‍, സൂസന്‍ അബ്രഹാം, ഷാജി പി, മല്ലിക സോമശേഖരന്‍, മിനി തോമസ്, ലളിത കുഞ്ഞന്‍ സംസാരിച്ചു.