തിരുവനന്തപുരം: ജനങ്ങള്‍ക്ക് അപ്രാപ്യമായ ഫാസിസ്റ്റ് സര്‍ക്കാരാണ് കേരളം ഭരിക്കുന്നതെന്ന് പ്രതിപക്ഷ നേതാവ് രമേശ് ചെന്നിത്തല. എല്ലാ അധികാരങ്ങളും മുഖ്യമന്ത്രിയില്‍ കേന്ദ്രീകരിച്ചിരിക്കുകയാണെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.
ധാര്‍ഷ്ട്യം, അധികാരപ്രമത്തത എന്നിവയാണ് സര്‍ക്കാരിന്റെ ശൈലി. മന്ത്രിസഭാ തീരുമാനങ്ങള്‍പോലും ജനങ്ങളെ അറിയിക്കുന്നില്ല. മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് സഹായം അനുവദിക്കുന്നതു മാത്രമാണ് മന്ത്രിസഭാ തീരുമാനമെന്ന നിലയില്‍ പത്രക്കുറിപ്പായി പുറത്തിറങ്ങുന്നത്. ഭരണത്തില്‍ അഴിമതിയും അനാശാസ്യവും ഇല്ലാതാക്കിയെന്നാണ് മുഖ്യമന്ത്രി അവകാശപ്പെടുന്നത്. അധികാരത്തിലേറി 144ാം ദിവസം ഇ.പി ജയരാജന്‍ മന്ത്രിസ്ഥാനം രാജിവച്ചത് പിന്നെ എന്തിനാണ്?. ജയരാജന്റേതല്ലാതെ മറ്റു പാര്‍ട്ടി നേതാക്കളുടെ ബന്ധുനിയമനം റദ്ദാക്കിയിട്ടില്ല. അഴിമതിയുടെ പേരില്‍ സി.പി.എമ്മും വി.എസ് അച്യുതാനന്ദനും 20 വര്‍ഷം കേസ് നടത്തി ജയിലിലാക്കിയ ആര്‍. ബാലകൃഷ്ണ പിള്ളയെ യു.ഡി.എഫ് ഭരണകാലത്ത് മുന്നോക്ക വികസന കോര്‍പറേഷന്‍ ചെയര്‍മാനാക്കിയപ്പോള്‍ രൂക്ഷമായി വിമര്‍ശിച്ചവര്‍ ഇപ്പോള്‍ പിള്ളയെ കാബിനറ്റ് റാങ്കോടെ അതേ പദവിയില്‍ നിയമിച്ചിരിക്കുകയാണ്.
കഴിഞ്ഞ സര്‍ക്കാരിന്റെ കാലത്ത് കെ.എം മാണിക്കെതിരേ അഴിമതി ആരോപണം ഉന്നയിച്ചവര്‍ ഇപ്പോള്‍ സഖ്യമുണ്ടാക്കുന്നു. എ.കെ ശശീന്ദ്രന്‍ മന്ത്രിസ്ഥാനം രാജിവച്ചത് സല്‍കൃത്യം ചെയ്തിട്ടാണോ?- ചെന്നിത്തല ചോദിച്ചു. യു.ഡി.എഫ് സര്‍ക്കാരിന്റെ അവസാന കാലത്തെടുത്ത തീരുമാനങ്ങള്‍ പരിശോധിക്കാന്‍ രൂപീകരിച്ച മന്ത്രിസഭാ ഉപസമിതിയുടെ റിപ്പോര്‍ട്ട് ഇതുവരെ പുറത്തുവന്നിട്ടില്ല. തീരുമാനങ്ങളൊന്നും റദ്ദാക്കിയിട്ടുമില്ല. ഒരുവര്‍ഷമായിട്ടും സര്‍ക്കാരിന് ഒന്നും ശരിയാക്കാനായിട്ടില്ല. ഭരണസ്തംഭനത്തിന്റെയും കെടുകാര്യസ്ഥതയുടെയും ഒരുവര്‍ഷമാണ് കടന്നുപോയത്. മന്ത്രിസഭയുടെ കൂട്ടുത്തരവാദിത്തം നഷ്ടപ്പെട്ടു. സര്‍ക്കാര്‍ മാധ്യമങ്ങളില്‍ നിന്നും ജനങ്ങളില്‍ നിന്നും അകന്നുനില്‍ക്കുന്നു. സി.പി.ഐയും സി.പി.എമ്മും തമ്മിലുള്ള അഭിപ്രായവ്യത്യാസം സര്‍ക്കാരിനെ സാരമായി ബാധിച്ചു.
സര്‍ക്കാരിന്റെ നേട്ടങ്ങളായി മുഖ്യമന്ത്രി അവകാശപ്പെടുന്ന പദ്ധതികള്‍ കഴിഞ്ഞ സര്‍ക്കാര്‍ തുടക്കമിട്ടതാണ്. പുതിയ പദ്ധതികളൊന്നും തുടങ്ങിയിട്ടില്ല. ശനിയാഴ്ച മുഖ്യമന്ത്രി പിണറായി വിജയന്‍ നടത്തിയ വാര്‍ത്താസമ്മേളനം ബജറ്റ് അവതരണം പോലെയായിരുന്നു. കഴിഞ്ഞ സര്‍ക്കാര്‍ 32 ലക്ഷം പേര്‍ക്ക് ക്ഷേമപെന്‍ഷന്‍ നല്‍കി. ഈ സര്‍ക്കാര്‍ അതില്‍ മൂന്നു ലക്ഷം പേരെ ഒഴിവാക്കിയാണ് പെന്‍ഷന്‍ നല്‍കുന്നത്. പശ്ചാത്തല വികസനത്തിനായി ഒന്നും ചെയ്തില്ല. പല പദ്ധതികളും കിഫ്ബി വഴി നടക്കുമെന്നുപറയുന്നത് അവകാശവാദം മാത്രമാണ്. കിഫ്ബി ഉണ്ടയില്ലാ വെടിയാണ്. സംസ്ഥാനത്ത് ശുചീകരണ പ്രവര്‍ത്തനങ്ങള്‍ കാര്യക്ഷമമായി നടക്കാത്തതിനാല്‍ ഡെങ്കിപ്പനി വ്യാപിക്കുന്നു. റേഷന്‍ കാര്‍ഡ് ഇതുവരെ വിതരണം ചെയ്തു തീര്‍ന്നില്ല. റേഷന്‍ വിതരണം അവതാളത്തിലായി. ക്രമസമാധാനത്തിനുള്ള ഇന്ത്യാ ടുഡേ അവാര്‍ഡ് കഴിഞ്ഞ വര്‍ഷത്തെ ക്രമസമാധാനത്തിനാണ്. അതിന്റെ അവകാശി താനാണ്. ഈ സര്‍ക്കാരിന്റെ ഭരണകാലത്ത് ചോദ്യ പേപ്പറും ബജറ്റും ചോര്‍ന്നെന്നും അദ്ദേഹം പറഞ്ഞു. സര്‍ക്കാരിനെതിരായ 63 ഇന കുറ്റപത്രം ചെന്നിത്തല വാര്‍ത്താസമ്മേളനത്തില്‍ അവതരിപ്പിച്ചു.