തിരുവനന്തപുരം: രാജകുമാറിന്റെ കസ്റ്റഡി മരണം സംബന്ധിച്ച് പി.ടി തോമസ് എം.എല്‍.എ പൊലിസ് കംപ്ലെയിന്റ് അതോറിറ്റിക്ക് പരാതി നല്‍കി. സംഭവവുമായി ബന്ധപ്പെട്ട് ഇപ്പോള്‍ നടക്കുന്ന അന്വേഷണം തൃപ്തികരമല്ലെന്നും കുറ്റക്കാരായ പൊലിസ് ഉദ്യോഗസ്ഥരെ രക്ഷിക്കാനുള്ള ശ്രമങ്ങളാണ് നടക്കുന്നതെന്നും സംസ്ഥാന പൊലിസ് കംപ്ലെയിന്റ് അതോറിറ്റി ചെയര്‍മാന്‍ ജസ്റ്റിസ് വി.കെ മോഹന് പി.ടി തോമസ് നല്‍കിയ പരാതിയില്‍ പറയുന്നു. ഇടുക്കി എസ്.പി വേണുഗോപാലിനെതിരേ നടപടിയെടുക്കണമെന്നും കത്തില്‍ ആവശ്യപ്പെട്ടിട്ടുണ്ട്. വേണുഗോപാല്‍ ഇടുക്കി എസ്.പിയായി ചുമതലയേറ്റ ശേഷം അദ്ദേഹത്തിന്റെ മകന്റെ വിവാഹത്തോട് അനുബന്ധിച്ച് പൊലിസ് വാഹനങ്ങള്‍ ദുരുപയോഗം ചെയ്തത്, വനിതാ പൊലിസുകാരെ ഉള്‍പ്പെടെ ഡ്യൂട്ടിക്ക് നിയോഗിച്ച സംഭവവുമെല്ലാം അന്വേഷിക്കണം. വണ്ടിപ്പെരിയാറില്‍ ഒരു എസ്റ്റേറ്റിന്റെ തര്‍ക്കവുമായി ബന്ധപ്പെട്ട് എസ്.പി നടത്തിയ ഇടപെടലിനെ കുറിച്ചും വാര്‍ത്തകള്‍ വന്നിട്ടുണ്ട്. ഇക്കാര്യങ്ങളിലും അന്വേഷണം നടത്തണമെന്നും പി.ടി തോമസ് കത്തില്‍ ആവശ്യപ്പെട്ടു.