മലപ്പുറം: ഇത് അഹമ്മദ് പട്ടേലല്ല... പാതിരാ പട്ടേലാണ്... ഇ. അഹമ്മദ് പാണക്കാട് മുഹമ്മദലി ശിഹാബ് തങ്ങള്‍ക്ക് അഹമ്മദ് പട്ടേലിനെ പരിചയപ്പെടുത്തിയത് ഇങ്ങനെയായിരുന്നു. അത് തീര്‍ത്തും ശരിയാണ്... പകല്‍ മുഴുവന്‍ പാര്‍ലമെന്റ് കാര്യങ്ങളും അര്‍ധരാത്രിവരെ രാഷ്ട്രീയ കാര്യങ്ങളിലും മുഴുകുന്ന അഹമ്മദ് പട്ടേല്‍ പൊതുപ്രവര്‍ത്തകര്‍ക്കിടയില്‍ വേറിട്ട വ്യക്തിതന്നെയായിരുന്നു. അഹമ്മദ് പട്ടേലുമായുളള പിതാവിന്റെ ബന്ധം ഓര്‍മകളിലേക്ക് കൊണ്ടുവരികയായിരുന്നു യൂത്ത് ലീഗ് സംസ്ഥാന അധ്യക്ഷന്‍ പാണക്കാട് മുനവ്വറലി ശിഹാബ് തങ്ങള്‍.
മുഹമ്മദലി ശിഹാബ് തങ്ങളുമായിട്ട് അഹമ്മദ് പട്ടേലിന് ആത്മബന്ധമായിരുന്നു. ദില്ലിയില്‍ എത്തുമ്പോള്‍ മദര്‍തെരേസ റോഡിലെ ക്രസ്റ്റ് വീട്ടില്‍ പട്ടേലിനൊപ്പമായിരുന്നു പിതാവിന്റെ കൂട്ട്. 1990 കളില്‍ പട്ടേലിന് കോണ്‍ഗ്രസ് കേരളത്തിന്റെ ചുമതല നല്‍കിയതോടെയാണ് പാണക്കാടുമായി കൂടുതല്‍ അടുപ്പമുണ്ടായത്. കേരള രാഷ്ട്രീയത്തില്‍ യു.പി.എയുടെ നിര്‍ണായക ഘടകമായി മുസ്‌ലിം ലീഗിനെ പരിഗണിക്കപ്പെട്ടതില്‍ പട്ടേലിന്റെ പങ്കും ചെറുതല്ല. ദില്ലിയില്‍നിന്ന് സോണിയ ഗാന്ധിയുടെ ദൂതുമായാണ് അഹമ്മദ് പട്ടേല്‍ പാണക്കാട്ടേക്ക് പലപ്പോഴും പറന്ന് എത്താറുളളതെന്നും മുനവ്വറലി തങ്ങള്‍ അനുസ്മരിച്ചു.