മാനന്തവാടി: പൂട്ടിയിട്ട വീട്ടിനുള്ളില്‍ മോഷണം നടത്തി നാട്ടുകാരെ വെട്ടിച്ച് കടന്നു കളഞ്ഞ മോഷ്ടാവിനെ പൊലിസ് പിടികൂടി.
കണ്ണൂര്‍ അരീക്കാമല എരുവിശ്ശേരി വളയാനക്കല്‍ വിപിന്‍ കുര്യ(26)നെയാണ് വെള്ളമുണ്ട പൊലീസ് കാസര്‍ക്കോട് വെച്ച് പിടികൂടിയത്. വെള്ളിയാഴ്ച രാത്രി എട്ടേനാലിലെ തുന്നന്‍ ആയിഷയുടെ വീട്ടില്‍ കൂട്ടാളിയായ ഇരിട്ടി സ്വദേശി പ്രശാന്തുമൊന്നിച്ചാണ് വിപിന്‍ മോഷണം നടത്തിയത്. പൂട്ടിയിട്ടിരുന്ന വീടിന്റെ മുകള്‍ ഭാഗത്ത് വാതില്‍ പൊളിച്ചായിരുന്നു അകത്ത് കയറിയത്. മോഷണം നടത്തുന്നതിനിടെ ആയിശയുടെ മകന്‍ അഹ്‌നാസ് വീട്തുറന്നു അകത്തുകയറിയപ്പോള്‍ കൈയിലുണ്ടായിരുന്ന ഇരുമ്പ് ദണ്ഡുപയോഗിച്ച് ഇവര്‍ ആഞ്ഞടിച്ചു. എന്നാല്‍ അത്ഭുതകരമായി ഒഴിഞ്ഞു മാറിയ യുവാവ് വീട്ടില്‍ നിന്നും പുറത്ത് കടന്ന് വാതില്‍ പൂട്ടിയതാണ് പരുക്കേല്‍ക്കാതെ രക്ഷപ്പെടാന്‍ കാരണമായത്. ഇതിനിടെ ഓടി രക്ഷപ്പെടുന്നതിനിടെ നാട്ടുകാര്‍ പ്രശാന്തിനെ പിടികൂടി വെള്ളമുണ്ട പൊലിസിന് കൈമാറി. രക്ഷപ്പെട്ട വിപിനെ കാസര്‍കോട് വെച്ച് പിടികൂടി ഇന്നലെ ഉച്ചയോടെ മോഷണം നടന്ന വീട്ടിലെത്തിച്ച് തെളിവെടുപ്പ് നടത്തി. 22,000 രൂപയായിരുന്നു വീട്ടില്‍ നിന്നും മോഷണം പോയത്. ഇതില്‍ പകുതിയോളം പണവും പഴ്‌സും കണ്ടെത്തിയിട്ടുണ്ട്. നിര്‍മാണ തൊഴിലാളികളായ രണ്ടുപേരും മോഷണം ലക്ഷ്യം വെച്ച് ബൈക്കിലെത്തി തരുവണയില്‍ കെട്ടിടനിര്‍മാണ സ്ഥലത്ത് നിന്നും കമ്പി സംഘടിപ്പിച്ച് വീടിന്റെ വാതില്‍ പൊളിച്ചാണ് അകത്ത് കടന്ന് മോഷണം നടത്തിയത്. വിപിനെതിരെ കണ്ണൂര്‍ ജില്ലയില്‍ വിവിധ പൊലിസ് സ്റ്റേഷനുകളിലായി അഞ്ച് മോഷണ കേസുകളും എറണാകുളത്ത് പോക്‌സോ കേസും നിലവിലുണ്ട്. നേരത്തെ നാട്ടുകാര്‍ പിടികൂടി പൊലിസിലേല്‍പ്പിച്ച പ്രശാന്തിനെതിരെ കണ്ണൂര്‍ ജില്ലയില്‍ 11 മോഷണ കേസുകളാണുള്ളത്. കേസിലെ ശിക്ഷ അനുഭവിക്കുന്നതിനിടെ ജയിലില്‍ വെച്ച് പരിചയപ്പെട്ട ഇരുവരും ചേര്‍ന്ന് നടത്തുന്ന മൂന്നാമത്തെ കളവാണ് പിടികൂടുയത്. വെള്ളമുണ്ട എസ്.ഐ ജിതേഷ് പി, എ.എസ്.ഐ മാരായ ജോസഫ്, പൗലോസ്, സീനിയര്‍ സി.പി.ഒ ബിജു വര്‍ഗീസ്, സി.പി.ഒമാരായ രാജേഷ്, മുഹമ്മദ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.