കൊട്ടിയം: കൊട്ടിയം പൊലിസ് സ്റ്റേഷന്‍ പരിധിയില്‍ ഗുണ്ടാസംഘങ്ങളുടെ അഴിഞ്ഞാട്ടത്തിന് അറുതിയില്ല.
കഴിഞ്ഞ രണ്ട് ദിവസമായി തുടരുന്ന അക്രമ സംഭവങ്ങളില്‍ ഒടുവിലായി മുന്‍ പഞ്ചായത്ത് പ്രസിഡന്റിന്റെ വീടുകയറി ആക്രമണം നടന്നു. ചൊവാഴ്ചയാണ് കണ്ണനല്ലൂരില്‍ പഞ്ചായത്ത് മുന്‍ പ്രസിഡന്റിന്റെ വീട് കയറി ആക്രമണം നടന്നത്.
മകനെ മര്‍ദിച്ച അക്രമികള്‍ക്കെതിരേ പൊലിസില്‍ പരാതി നല്‍കിയതിന്റെ വൈരാഗ്യത്തിലായിരുന്നു ആക്രമണം. തൃക്കോവില്‍വട്ടം ഗ്രാമ പഞ്ചായത്ത് മുന്‍ പ്രസിഡന്റ് കണ്ണനല്ലൂര്‍ സൗത്ത് വാലി മുക്കിന് സമീപം സജീവ് ഭവനത്തില്‍ റോസ് മേരിയുടെ വീടിന് നേരെയായിരുന്നു ആക്രമണം.
ചൊവ്വാഴ്ച അര്‍ധരാത്രി ഒരു മണിയോടെ മതില്‍ ചാടി കടന്നെത്തിയ മൂന്നംഗ സംഘമാണ് അതിക്രമം നടത്തിയത്. വീടിന്റെ ജനാല ചില്ലുകള്‍ എല്ലാം അടിച്ചു തകര്‍ത്ത അക്രമികള്‍ മുന്‍ഭാഗത്ത് സിറ്റൗട്ടിന്റെ സ്റ്റീല്‍ പൈപ്പുകളും നശിപ്പിച്ചു.
ബഹളം കേട്ട് അയല്‍വാസികള്‍ ഓടിയെത്തിയതോടെ അക്രമിസംഘം സമീപത്ത് പാര്‍ക്ക് ചെയ്തിരുന്ന ബൈക്കില്‍ കയറി കടന്നുകളഞ്ഞു.
റോസ് മേരിയും മകനും മാത്രമെ സംഭവ സമയം വീട്ടില്‍ ഉണ്ടായിരുന്നുള്ളു. റോസ് മേരിയുടെ മകന്‍ ആന്റണി (32)യെ ഒരു സംഘം കഴിഞ്ഞ ഞായറാഴ്ച വൈകിട്ട് അഞ്ച് മണിയോടെ കണ്ണനല്ലൂര്‍ സെന്റ് ആന്റണീസ് കുരിശടിയ്ക്കു സമീപം വച്ച് മര്‍ദിച്ചിരുന്നു.
ഈ സംഭവത്തില്‍ കൊട്ടിയം പൊലിസ് കൊലപാതക ശ്രമത്തിന് കേസെടുത്ത് അന്വേഷണം നടത്തി വരുന്നതിനിടെയായിരുന്നു സംഘം വീട്ടില്‍ കയറി അക്രമം നടത്തിയത്.
കൊട്ടിയത്ത് സ്വകാര്യ ആശുപത്രിയില്‍ ചികിത്സയിലായിരുന്ന ആന്റണി ചൊവാഴ്ചയാണ് വീട്ടില്‍ മടങ്ങിയെത്തിയത് .കേസ് പിന്‍വലിച്ച് ഒത്തുതീര്‍പ്പാക്കണമെന്ന് ആവശ്യപ്പെട്ട് ഒരു സംഘം റോസ് മേരിയുടെ വീട്ടിലെത്തി ഭീഷണിപ്പെടുത്തിയിരുന്നതായി റോസ് മേരി പറഞ്ഞു.
ഇതിന് വിസമ്മതം പറഞ്ഞതോടെ ഇവര്‍ മടങ്ങി പോയി. പിന്നീട് രാത്രിയിലെത്തി അതിക്രമിക്കുകയായിരുന്നു.
സംഭവമറിഞ്ഞ് കൊട്ടിയം എസ്.ഐ അനൂപ്, തൃദീപ് ചന്ദ്രന്‍, സ്‌പെഷ്യല്‍ ബ്രാഞ്ച് എസ്.ഐ .ഷാജി, എന്നിവരുടെ നേതൃത്വത്തില്‍ പൊലിസ് എത്തി തെളിവുകള്‍ ശേഖരിച്ചു.
സ്ഥലത്ത് നിന്നും അക്രമത്തിന് ഉപയോഗിച്ചതെന്ന് കരുതുന്ന ഇരുമ്പുകമ്പി പൊലിസ് കണ്ടെടുത്തു. കഴിഞ്ഞ ദിവസം വ്യത്യസ്ത സംഭവങ്ങളിലായി ഗുണ്ടാസംഘങ്ങളുടെ ആക്രമണത്തില്‍ വയോധികരായ ദമ്പതികളടക്കം ആറ് പേര്‍ക്ക് പരുക്കേറ്റിരുന്നു.