തൃശൂര്‍: സോളാര്‍ വിഷയത്തില്‍ അന്വേഷണത്തിന്റെ അടിസ്ഥാനത്തില്‍ തുടര്‍നടപടികളുണ്ടാകുമെന്ന് എല്‍.ഡി.എഫ് കണ്‍വീനര്‍ എ. വിജയരാഘവന്‍ പറഞ്ഞു. തൃശൂര്‍ പ്രസ്‌ക്ലബ്ബിന്റെ മീറ്റ് ദി പ്രസ് പരിപാടിയില്‍ സംസാരിക്കുകയായിരുന്നു അദ്ദേഹം.
രാജിവച്ച് വേറെ പാര്‍ട്ടിയില്‍ പോയവരുടേതല്ല, ഇരകളുടെ അഭിപ്രായമാണ് ആ കേസില്‍ പ്രധാനം. ബാര്‍ കോഴ കോണ്‍ഗ്രസുകാരുടെ വൈഭവമാണ് കാട്ടിത്തരുന്നത്. ബാര്‍ തുറക്കാനും പൂട്ടാനും വീണ്ടും തുറക്കാനും കോണ്‍ഗ്രസുകാര്‍ പിരിവ് നടത്തി.
പണം കൊടുത്ത് മടുത്തപ്പോള്‍ നാട്ടുകാര്‍ അറിയാതെ പറ്റില്ലല്ലോ എന്നുകരുതി തുറന്നുപറഞ്ഞു. അഴിമതി പുറത്തുവന്നാല്‍ നിയമനടപടികള്‍ സ്വീകരിക്കുക സര്‍ക്കാര്‍ നടപടിക്രമങ്ങളുടെ ഭാഗമാണ്. പാലാരിവട്ടം പാലം അഴിമതിക്കേസിലും കാസര്‍കോട് ജ്വല്ലറി തട്ടിപ്പ് കേസിലും അതാണുണ്ടായത്.
തദ്ദേശ തെരഞ്ഞെടുപ്പില്‍ ബി.ജെ.പിയുമായും വെല്‍ഫെയര്‍ പാര്‍ട്ടിയുമായും യു.ഡി.എഫ് സഖ്യമുണ്ടാക്കിയിട്ടുണ്ട്. കോണ്‍ഗ്രസ് ഉണ്ടാക്കിയ ഈ സഖ്യത്തിന്റെയെല്ലാം ഗുണഭോക്താക്കള്‍ വര്‍ഗീയ ശക്തികളാണെന്നും അദ്ദേഹം പറഞ്ഞു.
പ്രസ്‌ക്ലബ് വൈസ് പ്രസിഡന്റ് മുകേഷ്‌ലാല്‍ അധ്യക്ഷത വഹിച്ചു.