അരീക്കോട്: പൊലിസിന്റെ വാഹനപരിശോധനയ്ക്കിടെ പതിനേഴുകാരിയില്‍നിന്നു കഞ്ചാവ് പിടികൂടി. അരീക്കോട് പൊലിസ് നടത്തിയ വാഹനപരിശോധനയ്ക്കിടെ ഊര്‍ങ്ങാട്ടിരിയില്‍വച്ചാണ് പ്രായപൂര്‍ത്തിയാകാത്ത പെണ്‍കുട്ടി ഓടിച്ചിരുന്ന സ്‌കൂട്ടറില്‍നിന്ന് ഒന്നര കിലോ കഞ്ചാവ് പിടികൂടിയത്. കഞ്ചാവും സ്‌കൂട്ടറും പൊലിസ് കസ്റ്റഡിയിലെടുത്തു.
ആണ്‍കുട്ടികളെയും പെണ്‍കുട്ടികളെയും ഉപയോഗിച്ചു കഞ്ചാവ് വില്‍പന നടത്തുന്ന മുഖ്യപ്രതിയെക്കുറിച്ചു വ്യക്തമായ സൂചന ലഭിച്ചതായും പൊലിസ് പരിശോധന കര്‍ശനമാക്കിയതോടെ ലഹരിമാഫിയ സംശയം തോന്നാതിരിക്കാനാണ് കുട്ടികളെ ലഹരി വില്‍പനയ്ക്ക് ഉപയോഗിക്കുന്നതെന്നും അരീക്കോട് എസ്.ഐ കെ. സിനോദ് പറഞ്ഞു.
ബൈക്കുകളില്‍ ചെത്തിനടക്കാന്‍ താല്‍പര്യമുള്ള കുട്ടികളെ കെണിയില്‍ വീഴ്ത്തുന്നതിനായി ലഹരി മാഫിയ സജീവമായി രംഗത്തുണ്ട്. സ്‌കൂളുകള്‍ തുറക്കാന്‍ ദിവസങ്ങള്‍ മാത്രം ബാക്കിനില്‍ക്കെ വിദ്യാര്‍ഥികളെ ഉപയോഗിച്ചു ലഹരി വില്‍പന കൊഴുപ്പിക്കാന്‍ ശ്രമങ്ങള്‍ നടക്കുന്നുണ്ട്. വിദ്യാര്‍ഥികള്‍ ലഹരി മാഫിയയുടെ പിടിയിലകപ്പെടാതിരിക്കാന്‍ രക്ഷിതാക്കളും അധ്യാപകരും ഉണര്‍ന്നു പ്രവര്‍ത്തിക്കണമെന്നു പൊലിസ് അഭ്യര്‍ഥിച്ചു.
അരീക്കോട് എസ്.ഐ കെ. സിനോദ്, അസി. എസ്.ഐ കെ. മുഹമ്മദ്, സി.പി.ഒ രാജരത്‌നം, വിജിത്ത്, മായാദേവി എന്നിവരടങ്ങുന്ന സംഘമാണ് കഞ്ചാവ് പിടികൂടിയത്.