പാലക്കാട്: കരിമ്പുഴയിലെ കോട്ടപ്പുറം ഹെലന്‍ കെല്ലര്‍ ശതാബ്ദി സ്മാരക അന്ധവിദ്യാലയത്തിലെ വിദ്യാര്‍ഥികളുടെ യാത്രാ ക്ലേശത്തിന് പരിഹാരമാകുന്നു. കൊച്ചിന്‍ ഷിപ്പ് യാര്‍ഡ് ലിമിറ്റഡ്, സ്‌കൂളിലേക്ക് അനുവദിച്ച വാഹനത്തിന്റെ കൈമാറ്റം ഇന്ന് രാവിലെ 11.30ന് മന്ത്രി പ്രൊഫ. സി. രവീന്ദ്രനാഥ് നിര്‍വഹിക്കും. സി.എസ്.ആര്‍ ഫണ്ടില്‍ ഉള്‍പ്പെടുത്തിയാണ് വാഹനം നല്‍കുന്നത്.
വാഹനമില്ലാത്തതിനാല്‍ ഇത്രയും കാലം മറ്റുള്ളവരുടെ സഹായത്താലാണ് യാത്ര ചെയ്തിരുന്നത്. നടക്കുമ്പോള്‍ ഇവരുടെ മുന്നിലും പിന്നിലും സഹായികള്‍ അനുഗമിച്ചിരുന്നു. വാഹനം ലഭ്യമാവുന്നതോടെ അപകടകരമായ യാത്രയ്ക്ക് അവസാനമാവും. യാത്രാ സൗകര്യമില്ലാത്തതിനാല്‍ ചില വിദ്യാര്‍ഥികള്‍ സ്‌കൂളില്‍ വരാത്ത സാഹചര്യത്തിനും ഇതോടെ അവസാനമാകും. കാഴ്ച്ചയില്ലാത്തവരുടെ സംസ്ഥാനതല സംഘടനയായ കേരള ഫെഡറേഷന്‍ ഓഫ് ദി ബ്ലൈന്റ് (കെ.എഫ്.ബി) നടത്തുന്ന വിദ്യാലയമാണ് ഇത്.
പരിപാടിയില്‍ സി.എസ്.ആര്‍ കൊച്ചിന്‍ ഷിപ്പ് യാര്‍ഡ് ലിമിറ്റഡ് ചീഫ് ജനറല്‍ മാനെജര്‍ ഹെഡ് എം.ഡി വര്‍ഗീസ് പദ്ധതി വിശദീകരിക്കും. മുന്‍ എം.എല്‍.എ പി. കുമാരന്‍, ശ്രീകൃഷ്ണപുരം ബ്ലോക്ക് പഞ്ചായത്ത് പ്രസിഡന്റ് പി. അരവിന്ദാക്ഷന്‍, വിദ്യാഭ്യാസ വകുപ്പ് ഉദ്യോഗസ്ഥര്‍, ത്രിതല പഞ്ചായത്ത് അംഗങ്ങള്‍, കെ.എഫ്.ബി പ്രതിനിധികള്‍, സ്‌കൂള്‍ അധികൃതര്‍ എന്നിവര്‍ പങ്കെടുക്കും.