സ്വന്തം ലേഖകന്‍
കോഴിക്കോട്: നേതൃത്വത്തില്‍ ഏറ്റുമുട്ടലിലേക്കു നയിച്ച വടകര കല്ലാമലയിലെ വിവാദ സ്ഥാനാര്‍ഥിത്വം പിന്‍വലിക്കാന്‍ കോണ്‍ഗ്രസ് തീരുമാനിച്ചു. വടകര ബ്‌ളോക്ക് പഞ്ചായത്ത് കല്ലാമല ഡിവിഷനിലെ കോണ്‍ഗ്രസ് സ്ഥാനാര്‍ഥി കെ.പി ജയകുമാര്‍ മത്സരരംഗത്തുനിന്ന് പിന്‍മാറുമെന്ന് കെ.പി.സി.സി പ്രിസിഡന്റ് മുല്ലപ്പള്ളി രാമചന്ദ്രന്‍ അറിയിച്ചു.
ഇവിടെ യു.ഡി.എഫ്- ആര്‍.എം.പി.ഐ സ്ഥാനാര്‍ഥി സി.സുഗതന്റെ വിജയത്തിനു കോണ്‍ഗ്രസ് പ്രവര്‍ത്തിക്കും. ഇതോടെ ഒരാഴ്ചക്കാലം കോണ്‍ഗ്രസിനെ പിടിച്ചുലച്ച വിവാദത്തിന് അവസാനമായി.
ആര്‍.എം.പി.ഐയ്ക്ക് നല്‍കിയ സീറ്റില്‍ കോണ്‍ഗ്രസിലെ കെ.പി ജയകുമാറിന് മത്സരിക്കാന്‍ മുല്ലപ്പള്ളി രാമചന്ദ്രന്‍ കൈപ്പത്തി ചിഹ്‌നം അനുവദിച്ചതോടെയാണ് വിവാദം തുടങ്ങുന്നത്. മുല്ലപ്പള്ളി രാമചന്ദ്രന്റെ വീട് ഉള്‍പ്പെടുന്ന ഡിവിഷന്‍ താനറിയാതെ ആര്‍.എം.പിക്ക് നല്‍കിയതാണ് അദ്ദേഹത്തെ ചൊടിപ്പിച്ചിരുന്നത്. അതേസമയം തന്റെ പാര്‍ലമെന്റ് മണ്ഡലത്തില്‍ ധാരണ ലംഘിച്ച് കോണ്‍ഗ്രസ് സ്ഥാനാര്‍ഥി മത്സരരംഗത്തു വന്നതിനെ കെ.മുരളീധരന്‍ എം.പി ചോദ്യം ചെയ്തു. കോണ്‍ഗ്രസ് സ്ഥാനാര്‍ഥിയെ പിന്‍വലിക്കുന്നില്ലെങ്കില്‍ വടകരയില്‍ പ്രചാരണ രംഗത്തു നിന്ന് മാറിനില്‍ക്കുമെന്ന് മുരളി പ്രഖ്യാപിക്കുകയും ചെയ്തു. ഇതോടെ മുല്ലപ്പള്ളിയും മുരളീധരനും നേരിട്ട് കൊമ്പു കോര്‍ക്കുന്ന സാഹചര്യമുണ്ടായി.
കോണ്‍ഗ്രസ് സ്ഥാനാര്‍ഥിയുടെ പ്രചാരണത്തിനു പോകാത്ത മുരളീധരന്‍ ഇന്നലെ വടകര കുഞ്ഞിപ്പള്ളിയില്‍ ആര്‍.എം.പി സ്ഥാനാര്‍ഥിയ്ക്കായി പ്രസംഗിക്കുമെന്ന് പ്രഖ്യാപിച്ചിരുന്നു.
പൊതുയോഗത്തിനു ഏതാനും മണിക്കൂറുകള്‍ക്കു മുന്‍പാണ് തന്റെ സ്ഥാനാര്‍ഥിയെ പിന്‍വലിച്ചുകൊണ്ട് മുല്ലപ്പള്ളി രാമചന്ദ്രന്‍ പ്രഖ്യാപനം നടത്തിയത്. രാവിലെ കാലിക്കറ്റ് പ്രസ് ക്ലബ്ബില്‍ മീറ്റ് ദ ലീഡര്‍ പരിപാടിക്കിടെ മാധ്യമ പ്രവര്‍ത്തകരുടെ ചോദ്യത്തിനു മറുപടിയായാണ് സ്ഥാനര്‍ഥിത്വം പിന്‍വലിക്കുന്നതായി അദ്ദേഹം അറിയിച്ചത്.
സ്ഥാനാര്‍ഥിത്വം സംബന്ധിച്ചു കുറച്ച് കമ്മ്യുണിക്കേഷന്‍ ഗ്യാപ്പും അഭിപ്രായ വ്യത്യാസവും ഉണ്ടായതായി മുല്ലപ്പള്ളി പറഞ്ഞു. അത് പാര്‍ട്ടിയെ ആത്യന്തികമായി ക്ഷീണിപ്പിക്കുമെന്ന് ബോധ്യപ്പെട്ടു. യു.ഡി.എഫിന്റെ കെട്ടുറപ്പിനെ ബാധിക്കുന്ന ഒന്നും ഉണ്ടാകാന്‍ പാടില്ലെന്നാണ് തന്റെ നിലപാട്. ഈ സാഹചര്യത്തില്‍ കെ.പി ജയകുമാര്‍ മത്സരരംഗത്തുവിന്ന് പിന്‍മാറുമെന്ന് മുല്ലപ്പള്ളി പറഞ്ഞു.