റിയാദ്: ചതുർദിന സന്ദർശനത്തിന്റെ ഭാഗമായി ഇന്ത്യൻ ആർമി ചീഫിന്റെ സഊദി സന്ദർശനത്തിന് ഞായാറാഴ്ച തുടക്കമാകും. ഇന്ത്യൻ ആർമി ചീഫ് ജനറൽ മനോജ് മുകുന്ദ് നരവണെ സഊദി സന്ദർശനത്തോടൊപ്പം യുഎഇയും സന്ദർശിക്കുന്നുണ്ട്. ഇരു രാജ്യങ്ങളിലുമായി നാല് ദിവസമാണ് ആർമി ചീഫ് ജനറൽ ചിലവഴിക്കുക. അടുത്ത കാലത്തായി പ്രതിരോധ, സുരക്ഷാ സഹകരണവും പ്രത്യേകിച്ച് ഭീകരവാദത്തിനെതിരായ പ്രവർത്തനങ്ങളും വിവിധ രാജ്യങ്ങളുമായി ഇന്ത്യ വിപുലീകരിച്ചിട്ടുണ്ട്. ഇതിന്റെ ഭാഗമായാണ് സന്ദർശനം.

     ഇന്ത്യൻ വിദേശ കാര്യ ജയശങ്കർ മന്ത്രി അടുത്തിടെ യുഎഇ, ബഹ്‌റൈൻ എന്നീ അറബ് രാജ്യങ്ങൾ സന്ദർശിച്ചിരുന്നു .ഇതിന്റെ തുടർച്ചയായാണ് ഇന്ത്യൻ ആർമി ചീഫിന്റെ സന്ദർശനം.

    സഊദിയിലെത്തുന്ന എം എം നരവണെ നാഷണൽ ഡിഫൻസ് സർവ്വകലാശാലയിൽ പ്രത്യേക ചടങ്ങിൽ പങ്കെടുക്കും. തുടർന്നാണ് രണ്ടു ദിവസത്തെ സഊദിയിലെ ഔദ്യോഗിക പരിപാടികൾക്ക് ശേഷം യുഎഇയിലേക്ക് പുറപ്പെടുക. ന്യൂദൽഹിയിലെയും റിയാദിലെയും നയതന്ത്ര ഉദ്യോഗസ്ഥരും മറ്റ് ഉദ്യോഗസ്ഥരും സന്ദർശനങ്ങൾ സ്ഥിരീകരിച്ചെങ്കിലും യാത്രകളുടെ കൂടുതൽ വിശദാംശങ്ങൾ മൂന്ന് രാജ്യങ്ങളും പുറത്ത് വിട്ടിട്ടില്ല.