ന്യൂഡല്‍ഹി: ആദിവാസി വിഭാഗങ്ങള്‍ക്കിടയിലെ പ്രവര്‍ത്തനം കൂടുതല്‍ ശക്തമാക്കാന്‍ കോണ്‍ഗ്രസ് തീരുമാനം. ഇതിന്റെ ഭാഗമായി ആദിവാസികളുടെ ദേശീയ സമ്മേളനം വിളിക്കാന്‍ തീരുമാനിച്ചിട്ടുണ്ട്. ഇന്നലെ കോണ്‍ഗ്രസ് ഉപാദ്ധ്യക്ഷന്‍ രാഹുല്‍ഗാന്ധി ഡല്‍ഹിയില്‍ വിളിച്ചുചേര്‍ത്ത രാജ്യത്തിന്റെ വിവിധ ഭാഗങ്ങളില്‍ നിന്നുള്ള ആദിവാസി വിഭാഗം നേതാക്കളുടെ യോഗത്തിലാണ് ഇതുസംബന്ധിച്ച തീരുമാനം.
ആദിവാസി വിഭാഗത്തെ കോണ്‍ഗ്രസുമായി കൂടുതല്‍ അടുപ്പിക്കാനുള്ള നടപടികളും ആദിവാസികള്‍ നേരിടുന്ന പ്രശ്‌നങ്ങളും യോഗത്തില്‍ ചര്‍ച്ചയായി.
ആദിവാസി വിഭാഗങ്ങളില്‍ നിന്നും പ്രാദേശിക തലത്തില്‍ നേതാക്കളെ വളര്‍ത്തിക്കൊണ്ടുവരാന്‍ പ്രത്യേക ശ്രദ്ധനല്‍കണമെന്ന് യോഗത്തില്‍ രാഹുല്‍ഗാന്ധി നിര്‍ദ്ദേശം നല്‍കി.
കേരളത്തില്‍ നിന്ന് യോഗത്തില്‍ പങ്കെടുത്ത ആദിവാസി കോണ്‍ഗ്രസ് സംസ്ഥാന പ്രസിഡന്റ് ഐ.സി.ബാലകൃഷ്ണന്‍ എം.എല്‍.എ പാര്‍ട്ടിയുടെ വിവിധ വേദികളില്‍ ആദിവാസി വിഭാഗങ്ങള്‍ക്ക് പ്രാതിനിത്യം ഉറപ്പുവരുത്തണമെന്ന് ആവശ്യപ്പെട്ടു. ദേശീയതലത്തില്‍ ആദിവാസി സമ്മേളനമെന്ന നിര്‍ദ്ദേശം മുന്നോട്ടുവച്ചതും അദ്ദേഹമാണ്. കേരളത്തില്‍ ആദിവാസി, പട്ടികജാതി, പട്ടിക വര്‍ഗ്ഗ വിഭാഗങ്ങള്‍ മൊത്തം 4.85 ലക്ഷം വരും.
ഇതില്‍ 33 ശതമാനത്തോളം പേരും സ്വന്തമായി ഭൂമി ഇല്ലാത്തവരാണ്. കേരളത്തിലെ നല്ലൊരു ശതമാനം കോളനികൡലും കോണ്‍ഗ്രസിന് നിര്‍ണ്ണായക സ്വാധീനമുണ്ട്. എന്നാല്‍ ഇവിടങ്ങളില്‍ മാവാ വാദികള്‍ നുഴഞ്ഞുകയറാന്‍ ശ്രമം നടത്തുകയാണെന്ന് കോണ്‍ഗ്രസ നേതാക്കള്‍ പറയുന്നു.