തിരുവനന്തപുരം: സാഹിത്യകാരന്‍ പി. കേശവദേവിന്റെ സ്മരണയ്ക്കായി കേശവദേവ് ട്രസ്റ്റ് ഏര്‍പ്പെടുത്തിയിട്ടുള്ള പതിനഞ്ചാമത് പി. കേശവദേവ് പുരസ്‌കാരങ്ങള്‍ പ്രഖ്യാപിച്ചു. പി. കേശവദേവ് സാഹിത്യ പുരസ്‌കാരം എഴുത്തുകാരനും പ്രഭാഷകനും ചിന്തകനുമായ ഡോ. എം. വി പിള്ളയ്ക്കാണ്. പ്രവാസി മേഖലയില്‍ മലയാളസാഹിത്യ പോഷണത്തിന് അര്‍പ്പിച്ച അപൂര്‍വ സംഭാവനകള്‍ പരിഗണിച്ചാണ് ഡോ. എം. വി പിള്ളയ്ക്ക് പി. കേശവദേവ് സാഹിത്യപുരസ്‌കാരം നല്‍കുന്നത്.
ആരോഗ്യ വിദ്യാഭ്യാസ പ്രവര്‍ത്തനങ്ങള്‍ നടത്തുന്നതിന് നല്‍കുന്ന പി. കേശവദേവ് ഡയാബ്‌സ്‌ക്രീന്‍ കേരള പുരസ്‌കാരം കേരള ടൈപ്പ് 1 ഡയബെറ്റിസ് വെല്‍ഫെയര്‍ സൊസൈറ്റിക്കാണ്. പി. കേശവദേവിന്റെ പേരിലുള്ള പ്രത്യേക പുരസ്‌കാരം എറണാകുളം കലക്ടര്‍ ആയിരുന്ന കെ. മുഹമ്മദ് വൈ. സഫീറുള്ളക്കാണ്. എറണാകുളം ജില്ലയിലെ ആരോഗ്യമേഖലയില്‍ പൊതുജനോപകാരപ്രദമായ പ്രവര്‍ത്തനങ്ങള്‍ സമയബന്ധിതമായി നടപ്പിലാക്കിയതിനാണ് പുരസ്‌കാരം.
അന്‍പതിനായിരം രൂപയും ശില്‍പവും പ്രശസ്തിപത്രവും അടങ്ങുന്ന പുരസ്‌കാരം 17ന് വൈകിട്ട് നാലിന് ഹോട്ടല്‍ ഹില്‍ട്ടണ്‍ ഗാര്‍ഡനില്‍ നടക്കുന്ന ചടങ്ങില്‍ വിതരണം ചെയ്യും. വാര്‍ത്താസമ്മേളനത്തില്‍ ഡോ. ജോര്‍ജ് ഓണക്കൂര്‍, ഡോ. എന്‍. അഹമ്മദ് പിള്ള, ഡോ. പി. ജി ബാലഗോപാല്‍, ഡോ. അരുണ്‍ ശങ്കര്‍, ഡോ. ജ്യോതിദേവ് കേശവദേവ്, സീതാലക്ഷ്മി ദേവ് തുടങ്ങിയവര്‍ പങ്കെടുത്തു.