റിയാദ്: മേഖലയിലെ ഏറ്റവും വേഗതയേറിയ ഇന്റർനെറ്റ് അവതരിപ്പിച്ചതായി നോകിയയും സൈൻ സഊദിയും അറിയിച്ചു. അഞ്ചാം തലമുറയിലെ തന്നെ ഏറ്റവും വേഗതയേറിയ ഇൻഡോർ നെറ്റ് സഊദിയിലെ സൈൻ ആസ്ഥാനത്താണ് നോകിയ, സൈൻ സംയുക്തതയിൽ അവതരിപ്പിച്ചതെന്ന് നോക്കിയ അറിയിച്ചു. 5ജി സംവിധാനത്തിൽ 1.9 ജിബിപിഎസ് സ്പീഡാണ് ജിദ്ദയിലെ സൈൻ ആസ്ഥാന മന്ദിരത്തിൽ അവതരിപ്പിച്ചത്. നോകിയയുടെ എയർസ്‌കെയിൽ ഇൻഡോർ റേഡിയോ സിസ്റ്റം നിർണായക അതിവേഗ 5 ജി കണക്റ്റിവിറ്റി നൽകുന്നതായി നോകിയ അറിയിച്ചു. എയർസ്‌കെയിൽ ഇൻഡോർ റേഡിയോ സിസ്റ്റത്തിന്റെ (എസിആർ) ട്രയർ വിജയകരമായിരുന്നുവെന്നും കമ്പനി വ്യക്തമാക്കി.

    നോകിയയുടെ എ‌സി‌ആർ‌ എല്ലാ പ്രധാന നെറ്റ്‌വർക്ക് സാങ്കേതികവിദ്യകളെയും സപ്പോർട്ട് ചെയ്യുന്നതോടൊപ്പം 4 ജിയിൽ നിന്ന് 5 ജി എൻ‌ആറിലേക്ക് എളുപ്പത്തിൽ അപ്‌ഗ്രേഡുചെയ്യാനും സഹായിക്കുന്ന തരത്തിലാണ് രൂപകൽപ്പന ചെയ്‌തിരിക്കുന്നത്. ഒന്നിലധികം നിലകളിലുടനീളം ശക്തമായ ഉയർന്ന 5 ജി ഡാറ്റ യാതൊരു വിധ തടസവും കൂടാതെ നൽകാനും സാധിക്കും.

     കഴിഞ്ഞ വർഷം ഒക്ടോബറിലാണ് സൈൻ മൊബൈൽ നെറ്റ്‌വർക്ക് കമ്പനി സഊദിയിൽ വാണിജ്യാടിസ്ഥാനത്തിൽ 5 ജി സേവനങ്ങൾ ആരംഭിച്ചത്. നിലവിൽ രാജ്യത്തൊട്ടാകെയുള്ള 50 നഗരങ്ങളിലായി 4,600 ലധികം ടവറുകൾ 5 ജി സേവനങ്ങൾക്കായി അപ്ഗ്രേഡ് ചെയ്‌തിട്ടുണ്ട്‌. സഊദി വിഷൻ 2030 ന്റെ ഭാഗമായി വിവിധ പദ്ധതികളും സൈൻ ആസൂത്രം ചെയ്‌തിട്ടുണ്ട്‌.