കോഴിക്കോട്: നയതന്ത്ര സ്വര്‍ണ കള്ളക്കടത്തു കേസിലെ പ്രതി സ്വപ്ന സുരേഷിന് ജയിലിലുണ്ടായ ഭീഷണിക്കു പിന്നില്‍ സംസ്ഥാന സര്‍ക്കാറിന്റെ കരങ്ങളുണ്ടെന്ന് പ്രതിപക്ഷ നേതാവ് രമേശ് ചെന്നിത്തല.   

ജീവന് ഭീഷണിയുണ്ടെന്ന സ്വപ്നയുടെ വെളിപ്പെടുത്തല്‍ അതീവ ഗൗരവമുള്ളതാണ്. ഇതുമായി ബന്ധപ്പെട്ട് സമഗ്രമായ അന്വേഷണം നടത്തണം. കോഫെപോസ വകുപ്പിനുസരിച്ച് ജയിലില്‍ കിടക്കുന്ന പ്രതി കോടതിയില്‍ രഹസ്യമൊഴി നല്‍കുമ്പോള്‍ സംഭവത്തിനു പിന്നില്‍ സര്‍ക്കാറിന്റെ കരങ്ങള്‍ ഉണ്ടെന്ന് സംശയിക്കേണ്ടതാണ്. ഇതു സംബന്ധിച്ച് കേന്ദ്ര ഏജന്‍സി അന്വേഷണം നടത്തണം. 

സ്വര്‍ണക്കടത്തു കേസിലെ ഉന്നതന്‍ ആരാണെന്ന് ഇനിയെങ്കിലും മുഖ്യമന്ത്രി വ്യക്തമാക്കണം. 

ഇ.ഡി ഹാജരാകാന്‍ ആവശ്യപ്പെടുന്ന സന്ദര്‍ഭങ്ങളിലെല്ലാം ആശുപത്രിയില്‍ ചികിത്സ തേടുന്ന മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറി സി.എം രവീന്ദ്രന്റെ നടപടി സംശയം ജനിപ്പിക്കുന്നതാണ്. രഹസ്യങ്ങള്‍ വെളിപ്പെടുത്തും എന്നതിനാല്‍ രവീന്ദ്രന്റെ ജീവനും ഭീഷണിയുണ്ട്. അദ്ദേഹത്തിന്റെ ജീവനു സംരക്ഷണം നല്‍കണമെന്നും ചെന്നിത്തല ആവശ്യപ്പെട്ടു.