'ഭേഷജ'ത്തിന് മികച്ച പ്രതികരണം
അജേഷ് ചന്ദ്രന്‍
തിരുവനന്തപുരം: സംസ്ഥാനത്ത് ആരംഭിച്ച ആയുര്‍വേദ കൊവിഡ് ചികിത്സയ്ക്ക് മികച്ച പ്രതികരണം. 'ഭേഷജം' എന്ന് പേരിട്ടിരിക്കുന്ന ചികിത്സാപദ്ധതിയില്‍ നിരവധിപേരാണ് ദിനംപ്രതി താല്‍പര്യം പ്രകടിപ്പിക്കുന്നത്. അഞ്ചുദിവസം മുന്‍പ് ആരംഭിച്ച 'ഭേഷജ'ത്തില്‍ ഇതുവരെ 3,055 പേര്‍ ചികിത്സതേടി.
കഴിഞ്ഞദിവസം മാത്രം 277 കൊവിഡ് ബാധിതരാണ് ആയുര്‍വേദ ചികിത്സയ്ക്കായി എത്തിയത്. സംസ്ഥാനത്തെ 1,206 ആയുര്‍രക്ഷാ ക്ലിനിക്കുകളിലൂടെയാണ് ചികിത്സ നല്‍കുന്നത്. വീടുകളിലും ഫസ്റ്റ്, സെക്കന്‍ഡ് ലൈന്‍ ചികിത്സാകേന്ദ്രങ്ങളിലുമുള്ള ഗുരുതരാവസ്ഥയില്ലാത്തവര്‍ക്കാണ് ചികിത്സ ലഭ്യമാക്കുന്നത്. രോഗനിര്‍ണയത്തിനും ചികിത്സ

യ്ക്കുമായി ടെലിമെഡിസിന്‍, വിഡിയോ കോണ്‍ഫറന്‍സിങ് സംവിധാനങ്ങള്‍ ഏര്‍പ്പെടുത്തിയിട്ടുണ്ട്. സ്റ്റേറ്റ് ആയുര്‍വേദ കൊവിഡ് സെല്ലിനാണ് മേല്‍നോട്ടച്ചുമതല.
ആയുര്‍വേദ ചികിത്സ ആവശ്യമുള്ള കൊവിഡ് ബാധിതര്‍ക്ക് തൊട്ടടുത്തുള്ള ആയുര്‍വേദ സ്ഥാപനവുമായി ബന്ധപ്പെടാം. ആശാവര്‍ക്കര്‍മാര്‍, പഞ്ചായത്ത് പ്രതിനിധികള്‍ തുടങ്ങിയവര്‍ മുഖാന്തരവും ചികിത്സ ആവശ്യപ്പെടാം. അര്‍ഹരായ രോഗികള്‍ക്ക് വീടുകളിലും കൊവിഡ് സെന്ററുകളിലും ചികിത്സ ലഭ്യമാകും.
ഇന്ദുകാന്തം കഷായം, സുദര്‍ശനം ഗുളിക തുടങ്ങി രോഗാവസ്ഥയ്ക്ക് അനുയോജ്യമായ നിരവധി ഔഷധങ്ങളാണ് ഭേഷജം പദ്ധതിയില്‍ ഉള്‍പ്പെടുത്തിയിരിക്കുന്നത്. യോഗ, ശ്വസനവ്യായാമം എന്നിവയും ആവശ്യക്കാര്‍ക്ക് നല്‍കിവരുന്നുണ്ട്. നിലവില്‍ പൂര്‍ണമായും സൗജന്യമായാണ് സേവനം. ഇക്കഴിഞ്ഞ നവംബര്‍ 18ലെ സര്‍ക്കാര്‍ ഉത്തരവിലൂടെയാണ് കേരളത്തില്‍ കൊവിഡിന് ആയുര്‍വേദ, യോഗ ചികിത്സയ്ക്ക് അനുമതി നല്‍കിയത്.