ഓമശ്ശേരി: സാമുദായിക പിന്തിരിപ്പന്‍ കക്ഷികളെന്ന് സി.പി.എം തന്നെ പറയുന്ന സംഘടനകളുമായി പരസ്യമായി കൂട്ടുകൂടി സീറ്റ് നിലനിര്‍ത്തിയ ഇടതുപക്ഷത്തിനു ഇരട്ട മുഖമാണെന്ന് മണ്ഡലം മുസ്‌ലിം ലീഗ് സെക്രട്ടറി പി.വി അബ്ദുല്‍ റഹ്മാന്‍ മാസ്റ്റര്‍, പഞ്ചായത്ത് മുസ്‌ലിം ലീഗ് പ്രസിഡന്റ് യു.കെ അബു, ജനറല്‍ സെക്രട്ടറി കെ.കെ അബ്ദുല്ലക്കുട്ടി, സെക്രട്ടറി യൂനുസ് അമ്പലക്കണ്ടി എന്നിവര്‍ സംയുക്ത പ്രസ്താവനയില്‍ പറഞ്ഞു. ജനവിധി പാര്‍ട്ടിയും മുന്നണിയും മാനിക്കുന്നു. എന്നാല്‍ ഇവരുണ്ടാക്കിയ അവിശുദ്ധ കൂട്ടുകെട്ട് ജനം തിരിച്ചറിയണമെന്നും നേതാക്കള്‍ പറഞ്ഞു.
കഴിഞ്ഞ പഞ്ചായത്ത് തെരഞ്ഞെടുപ്പിനേക്കാള്‍ 110 വോട്ട് യു.ഡി.എഫ് സ്ഥാനാര്‍ഥിക്ക് ഇത്തവണ ലഭിച്ചിട്ടുണ്ട്. ഉപതെരഞ്ഞെടുപ്പില്‍ യു.ഡി.എഫിനു രാഷ്ട്രീയപരമായി നേട്ടമാണുണ്ടായത്. കഴിഞ്ഞ തവണ വെല്‍ഫെയര്‍ പാര്‍ട്ടിയുടെ പിന്തുണയില്ലാതെ ഇടതു മുന്നണി 19 വോട്ടിന്റെ ഭൂരിപക്ഷത്തിനാണു ജയിച്ചത്. ഇത്തവണ വെല്‍ഫെയര്‍ പാര്‍ട്ടിയുമായി കൂട്ടുചേര്‍ന്നു മത്സരിച്ചിട്ടും 76 വോട്ടിന്റെ ഭൂരിപക്ഷമേ ലഭിച്ചുള്ളൂ. വിചിത്ര കൂട്ടുകെട്ടിനെതിരേയുള്ള ശക്തമായ പ്രതിഷേധമാണ് ഇതു സൂചിപ്പിക്കുന്നത്- നേതാക്കള്‍ പറഞ്ഞു.
വിലക്കയറ്റത്തില്‍ പ്രതിഷേധിച്ച് പിണറായി സര്‍ക്കാരിനെതിരേ ഇന്നലെ മണ്ഡലംതലങ്ങളില്‍ വെള്ളം തിളപ്പിച്ചു സമരം ചെയ്ത വെല്‍ഫെയര്‍ പാര്‍ട്ടി തെരഞ്ഞെടുപ്പില്‍ ഇരട്ടത്താപ്പു നയമാണു സ്വീകരിക്കുന്നതെന്നും ലീഗ് ഭാരവാഹികള്‍ അഭിപ്രായപ്പെട്ടു.