ഡമസ്‌കസ്:  കിഴക്കന്‍ സിറിയയില്‍ യു.എസ് സഖ്യസേന നടത്തിയ വ്യോമാക്രമണത്തില്‍ 35 സിവിലിയന്‍മാര്‍ കൊല്ലപ്പെട്ടു. സ്ത്രീകളും കുട്ടികളുമാണ് കൊല്ലപ്പെട്ടവരില്‍ ഭൂരിഭാഗവും.  

ജനവാസ പ്രദേശത്താണ് ആക്രമണമുണ്ടായതെന്ന് സിറിയന്‍ മനുഷ്യാവകാശ സംഘം പറയുന്നു. ഐ.എസ് അധിനിവേശ പ്രദേശമാണിത്. കൊല്ലപ്പെട്ടവരില്‍ 26 പേര്‍ ഐ.എസ് പ്രവര്‍ത്തകരുടെ ബന്ധുക്കളാണെന്നാണ് റിപ്പോര്‍ട്ടില്‍ പറയുന്നത്. മൊറോക്കന്‍ വംശജരും കൊല്ലപ്പെട്ടവരില്‍ ഉള്‍പെടുന്നതായി സിറിയന്‍ ഒബ്‌സര്‍വേറ്ററി തലവന്‍ റാമി റഹ്മാന്‍ പറഞ്ഞു.

പ്രദേശത്ത് സഖ്യസേന ബുധനാഴ്ച നടത്തിയ ആക്രമണത്തില്‍ 15 പേര്‍ കൊല്ലപ്പെട്ടിരുന്നു. ഐ.എസിനെ തകര്‍ക്കാനെന്ന പേരില്‍ ഏപ്രില്‍ 23നും മെയ് 23നും ഇടയിലായി സേന നടത്തിയ ആക്രമണങ്ങളില്‍ 225 സിവിലിയന്‍മാര്‍ കൊല്ലപ്പെട്ടതായി റിപ്പോര്‍ട്ടുകള്‍ പറയുന്നു.  

മാര്‍ച്ച് 2011 മുതല്‍ രാജ്യത്ത് നടക്കുന്ന സംഘര്‍ഷങ്ങളില്‍ ആയിരക്കണക്കിനാളുകളാണ് കൊല്ലപ്പെട്ടത്.