തിരുവനന്തപുരം: മൈലം ജി.വി രാജ സ്‌പോര്‍ട്‌സ് ഹോസ്റ്റലില്‍ ഭക്ഷ്യവിഷബാധ. 85 പെണ്‍കുട്ടികളെ തിരുവനന്തപുരം മെഡിക്കല്‍ കോളജ് ആശുപത്രിയിലും പേരൂര്‍ക്കട സര്‍ക്കാര്‍ ആശുപത്രിയിലുമായി പ്രവേശിപ്പിച്ചു. വെള്ളിയാഴ്ച രാത്രിയോടെ തന്നെ പലര്‍ക്കും ദേഹാസ്വാസ്ഥ്യമുണ്ടായതിനെ തുടര്‍ന്ന് ചികിത്സ തേടിയിരുന്നു.

ഇന്നലെ കൂടുതല്‍ പേര്‍ ആശുപത്രിയില്‍ പ്രവേശിച്ചു. തിരുവനന്തപുരം, പാലക്കാട്, പത്തനംതിട്ട, മലപ്പുറം ജില്ലകളിലെ കുട്ടികളാണ് ആശുപത്രിയിലുള്ളത്. വെളളിയാഴ്ച രാത്രി ചപ്പാത്തിയും ബീഫ് കറിയും കഴിച്ചതിനു ശേഷമാണ് സുഖമില്ലാതായതെന്ന് കുട്ടികള്‍ പറഞ്ഞു.

മെഡിക്കല്‍ കോളജില്‍ പ്രവേശിപ്പിച്ച വിദ്യാര്‍ഥിനികള്‍ അപകടനില തരണം ചെയ്തതായി ആശുപത്രി അധികൃതര്‍ അറിയിച്ചു. പേരൂര്‍ക്കട ആശുപത്രിയില്‍ പ്രവേശിപ്പിച്ചിട്ടുള്ള 72 കുട്ടികള്‍ നിരീക്ഷണത്തിലാണ്.

നേരത്തേയും ഹോസ്റ്റലില്‍ ഇത്തരത്തില്‍ ഭക്ഷ്യവിഷബാധ ഉണ്ടായിട്ടും അധികൃതരുടെ ഭാഗത്ത് നിന്നു നടപടി ഉണ്ടായിട്ടില്ലെന്ന് ആക്ഷേപമുയര്‍ന്നിട്ടുണ്ട്.