യു.ഡി.എഫ് തകര്‍ച്ചയില്‍
കൊട്ടാരക്കര: കേരളാ കോണ്‍ഗ്രസ് ജോസ് കെ. മാണി വിഭാഗം എല്‍.ഡി.എഫിനൊപ്പം ചേര്‍ന്നത് ഇടതുമുന്നണിക്ക് ഗുണകരമായെന്നും കേരളാ കോണ്‍ഗ്രസുകളുടെ ഏകീകരണം തന്റെ സ്വപ്നമായിരുന്നെന്നും കേരളാ കോണ്‍ഗ്രസ് (ബി) ചെയര്‍മാനും മുന്നോക്ക വികസന കോര്‍പറേഷന്‍ ചെയര്‍മാനുമായ ആര്‍. ബാലകൃഷ്ണപിള്ള വാര്‍ത്താസമ്മേളനത്തില്‍ പറഞ്ഞു.
തദ്ദേശ തെരഞ്ഞെടുപ്പിനെ നിയമസഭാ തിരഞ്ഞെടുപ്പിന്റെ മിനിസര്‍വേയായി കണക്കാക്കാം. ഇപ്പോള്‍ നേടിയ തകര്‍പ്പന്‍ വിജയം നിയമസഭാ തിരഞ്ഞെടുപ്പിലും ആവര്‍ത്തിക്കും. യു.ഡി.എഫ് തകര്‍ന്നുകൊണ്ടിരിക്കുകയാണ്. ജനങ്ങള്‍ ഇഷ്ടപ്പെടുന്ന നേതാക്കള്‍ ഇപ്പോള്‍ അവര്‍ക്കില്ല. ജനകീയ വിഷയങ്ങളില്‍ ഇടപെടാതെ വാര്‍ത്താസമ്മേളനം നടത്തി ആളാകാനാണ് കോണ്‍ഗ്രസ് നേതാക്കള്‍ മത്സരിക്കുന്നത്.
ആളും ആരവങ്ങളുമൊഴിഞ്ഞ കളിക്കളങ്ങളായി യു.ഡി.എഫ് ആസ്ഥാനങ്ങള്‍ മാറി. ഈ അവസരം മുതലെടുത്താണ് കേന്ദ്ര ഭരണത്തിന്റെ തണലില്‍ ബി.ജെ.പി മുന്നേറ്റമുണ്ടാക്കുന്നത്. ഇതു തിരിച്ചറിയാനുള്ള കഴിവു പോലും കെ.പി.സി.സി നേതൃത്വത്തിനില്ല. കൊട്ടാരക്കരയില്‍ പാര്‍ട്ടി പ്രതീക്ഷച്ചതിലധികം വിജയമാണുണ്ടായത്. എട്ടില്‍ ആറു സീറ്റുകളില്‍ വിജയിക്കാനായെന്നും അദ്ദേഹം പറഞ്ഞു.