ചണ്ഡീഗഡ്: മാതാവ് ഓടയിലെറിഞ്ഞ കുഞ്ഞിനെ രക്ഷപ്പെടുത്തിയത് തെരുവുനായ്ക്കള്‍. കെയ്തല്‍ നഗരത്തിലെ ഓടയിലേക്കാണ് പ്ലാസ്റ്റിക് കവറിലാക്കി പെണ്‍കുഞ്ഞിനെ മാതാവ് എറിഞ്ഞത്. പ്ലാസ്റ്റിക് കവര്‍ അനങ്ങുന്നത് കണ്ട തെരുവുനായ്ക്കള്‍ ഇത് വലിച്ചിഴച്ച് പുറത്തെത്തിച്ചു. തുടര്‍ന്ന് നിര്‍ത്താതെ കുരച്ച് ആളുകളെ കൂട്ടുകയായിരുന്നു. ഇതുവഴി നടന്നുപോയവര്‍ ഓടിക്കൂടി പ്ലാസ്റ്റിക് കവര്‍ തുറന്നുനോക്കിയപ്പോഴാണ് കുഞ്ഞിനെ കണ്ടത്. ഉടന്‍ പൊലിസില്‍ അറിയിക്കുകയായിരുന്നു. ഇന്നലെ പുലര്‍ച്ചെ നാലിനായിരുന്നു സംഭവം. കുഞ്ഞിന്റെ ആരോഗ്യസ്ഥിതി ഗുരുതരമാണെന്ന് ഡോക്ടര്‍മാര്‍ അറിയിച്ചു.