മഞ്ചേരി: ഗവ. മെഡിക്കല്‍ കോളജിന് മെഡിക്കല്‍ കൗണ്‍സിലിന്റെ സ്ഥിരാംഗീകാരം ലഭ്യമാക്കുന്നതിന്റെ ഭാഗമായി കെട്ടിടനിര്‍മാണം തുടങ്ങാനുള്ള നടപടികള്‍ ആരംഭിച്ചു. നിര്‍മാണ പ്രവൃത്തി ആരംഭിക്കുന്നതിനാവശ്യമായ വസ്തുക്കള്‍ എത്തിക്കാന്‍ വഴിയൊരുക്കി കഴിഞ്ഞു. ജൂലൈയില്‍ 69 കോടി രൂപയുടെ പ്രവൃത്തിക്ക് ടെന്‍ഡറായെങ്കിലും സ്ഥലത്തെ പുല്ലുപോലും നീക്കിയിരുന്നില്ല. നിര്‍മാണ സാമഗ്രികളും യന്ത്രങ്ങളും എത്തിക്കാന്‍ വഴിയില്ലെന്നു കരാരെടുത്ത ഏജന്‍സി നേരത്തെ കോളജ് അധികൃതരുടെ ശ്രദ്ധയില്‍പെടുത്തിയിരുന്നു. പൈലിങ്, പാറപൊട്ടിക്കല്‍, കോണ്‍ക്രീറ്റ് എന്നിവയുടെ യന്ത്രങ്ങള്‍, നീളത്തിലുള്ള കമ്പി എന്നിവ എത്തിക്കുന്നതിനുള്ള തടസം ഉന്നയിച്ചിരുന്നു.
വാഹനങ്ങള്‍ക്ക് എത്താനുള്ള വഴി നിര്‍മിച്ചതോടെ പ്രവൃത്തി ഉടന്‍ തുടങ്ങും. ഹോസ്റ്റല്‍ കെട്ടിടത്തിന്റെ നിര്‍മാണമാണ് ആദ്യം തുടങ്ങുന്നത്. നിലം ഒരുക്കല്‍, പൈലിങ് യന്ത്രങ്ങള്‍ എത്തിക്കാനുള്ള വഴിയൊരുക്കല്‍ എന്നിവ പൂര്‍ത്തിയായി. കെട്ടിടനിര്‍മാണത്തിന് ആവശ്യമായ സാമഗ്രികളെത്തിക്കാന്‍ ദേശീയ ഗെയിംസ് വില്ലേജില്‍നിന്ന് എത്തിച്ച പ്രീഫാബ് കെട്ടിടങ്ങളിലൊന്നും കെ.എസ്.ഇബി.യുടെ ഹൈടെന്‍ഷന്‍ ലൈനും തടസമായിരുന്നു. വൈദ്യുതിലൈന്‍ മാറ്റി സ്ഥാപിക്കാന്‍ കോളജ് അധികൃതരുടെ ഭാഗത്തുനിന്ന് നടപടി തുടങ്ങി. കെട്ടിടത്തിന്റെ നിര്‍മാണം തുടങ്ങുന്നതോടെ ദൃശ്യങ്ങള്‍ ഉള്‍പ്പെടെയുള്ള രേഖകളും സര്‍ക്കാര്‍ ഉത്തരവുകളും സഹിതം അംഗീകാരത്തിനായി വീണ്ടും മെഡിക്കല്‍ കൗണ്‍സിലിനെ സമീപിക്കും. ആരോഗ്യ സെക്രട്ടറി നല്‍കിയ സത്യവാങ്മൂലവും എം.സി.ഐക്ക് സമര്‍പ്പിക്കും. സത്യവാങ്മൂലം കിട്ടിയാല്‍ പുനപരിശോധനക്കായി എം.സി.ഐ സംഘം വീണ്ടും കോളജിലെത്തും.