ഫുട്ബോളിലെ എക്കാലത്തെയും മികച്ച താരമായി ക്രിസ്റ്റ്യാനോ റൊണാൾഡോയെ തിരഞ്ഞെടുത്തിരിക്കുന്ന റയൽ മാഡ്രിഡ് പരിശീലകൻ കാർലോ അൻസലോട്ടി. റയൽ മാഡ്രിഡിൽ റൊണാൾഡോ ഒരു യുഗം അടയാളപ്പെടുത്തിയെന്നാണ് അൻസലോട്ടി പറഞ്ഞത്. മാഡ്രിഡ് എക്സ്ട്രായിലൂടെ സംസാരിക്കുകയായിരുന്നു റയൽ പരിശീലകൻ.

'ക്രിസ്റ്റ്യാനോ റൊണാൾഡോ ഫുട്ബോളിൽ ഒരു യുഗത്തെ അടയാളപ്പെടുത്തിയിട്ടുണ്ട്. എന്റെ അഭിപ്രായത്തിൽ അദ്ദേഹം മികച്ചവനാണ്. മാഡ്രിഡിൽ അദ്ദേഹം എന്നെ വളരെയധികം സഹായിച്ചു,' കാർലോ അൻസലോട്ടി പറഞ്ഞു. 

2009 മുതൽ 2018 വരെയാണ് റൊണാൾഡോ റയലിനൊപ്പം കളിച്ചത്. ഈ കാലയളവിൽ റയലിന്റെ ചരിത്രത്തിലെ ഏറ്റവും മികച്ച താരമായി റൊണാൾഡോ മാറുകയായിരുന്നു. റയലിനായി 438 മത്സരങ്ങളിൽ നിന്ന് 450 ഗോളുകളും 131 അസിസ്റ്റുകളും ആണ് റൊണാൾഡോ നേടിയത്.

2018ൽ 100 മില്യൺ യൂറോക്ക് റൊണാൾഡോ ഇറ്റാലിയൻ ക്ലബ് യുവന്റസിലേക്ക് ചേക്കേറുകയായിരുന്നു. 2021ൽ റൊണാൾഡോ തന്റെ പഴയ തട്ടകമായ മാഞ്ചസ്റ്റർ യുണൈറ്റഡിലേക്ക് മടങ്ങി എത്തിയിരുന്നു. പിന്നീട് 2023ൽ റൊണാൾഡോ സഊദി ക്ലബായ അൽ നസറിലേക്കും ചേക്കേറുകയായിരുന്നു.